തിരുവനന്തപുരം: സമ്പൂര്ണ്ണ ലോക്ഡൗണ് സംസ്ഥാനത്ത് ഇന്നും തുടരും. ജൂണ് 16 വരെ ലോക്ഡൗണ് നീട്ടിയ സാഹചര്യത്തില് ജൂണ് 11 ന് അധിക ഇളവുകളോടെ കൂടുതല് കടകള് തുറക്കാനും ജൂണ് 12, 13 തീയതികളില് കര്ശന നിയന്ത്രണമേര്പ്പെടുത്താനുമാണ് സര്ക്കാര് തീരുമാനിച്ചിരുന്നത്. ഇന്നലെയും സമ്പൂര്ണ്ണ ലോക്ഡൗണ് ആയിരുന്നു സംസ്ഥാനത്ത്.
പാര്സല് വാങ്ങാന് ഇന്നും ഹോട്ടലുകളില് നിന്ന് അനുമതിയില്ല. ഓണ്ലൈന് ഓര്ഡര് മാത്രമാണ് അനുവദിക്കുന്നത്. സംസ്ഥാനത്ത് 2000 പേര് ഇന്നലെ മാത്രം ചട്ടലംഘനത്തിന് അറസ്റ്റിലായി. ഇന്നലെ 3500 വാഹനങ്ങള് പിടിച്ചെടുക്കുകയും 5000 പേര്ക്കെതിരെ കേസെടുക്കുകയും ചെയ്തു.
സാമൂഹിക അകലം കര്ശനമായി പാലിച്ചുകൊണ്ട് നിര്മ്മാണ പ്രവര്ത്തനങ്ങള് അനുവദിക്കും. നിര്മ്മാണ പ്രവര്ത്തനങ്ങളുടെ വിവരം സമീപത്തെ പോലീസ് സ്റ്റേഷനില് മുന്കൂറായി അറിയിച്ചിരിക്കണം. പഴം, പച്ചക്കറി, മീന്, മാംസം തുടങ്ങി അവശ്യ വസ്തുക്കള് വില്ക്കുന്ന കടകള്ക്ക് രാവിലെ ഏഴ് മുതല് വൈകിട്ട് ഏഴ് വരെ തുറക്കാം. ബുധനാഴ്ചയ്ക്ക് ശേഷം ലോക് ഡൗണില് വലിയ ഇളവുകള്ക്ക് സാധ്യതയുണ്ട്. ടെസ്റ്റ് പോസിറ്റിവിറ്റി പതിനാലിലും താഴെയെത്തിയ സാഹചര്യത്തില് ആണിത്.
