കോട്ടയം: കെ.എസ്.ആര്‍.ടി.സി ബസില്‍ അപമര്യാദയായി പെരുമാറിയ കണ്ടക്ടറെ ഹൈസ്കൂള്‍ വിദ്യാര്‍ത്ഥിനിയുടെ പരാതിയെ തുടര്‍ന്ന് അറസ്റ്റ് ചെയ്തു. കഴിഞ്ഞദിവസം വൈക്കത്താണ് സംഭവം. വൈക്കം കെ.എസ്.ആര്‍.ടി.സി ഡിപ്പോയിലെ കണ്ടക്ടര്‍ വെച്ചൂര്‍ ചേരകുളങ്ങര കിഴക്കേപുലപ്പള്ളില്‍ പി.പി അനിലിനെയാണ് (36) വെള്ളൂര്‍ പോലീസ് അറസ്റ്റ് ചെയ്തത്. കോടതിയില്‍ ഹാജരാക്കിയ ഇയാളെ റിമാന്‍‌ഡ് ചെയ്തു.
പെണ്‍കുട്ടി സ്ഥിരമായി ഈ ബസിലാണ് യാത്രചെയ്തിരുന്നത്. മിക്കപ്പോഴും ഇയാള്‍ ടിക്കറ്റ് കൊടുക്കുമ്പോഴും ചില്ലറ വാങ്ങുമ്പോഴും അറിയാത്ത രീതിയില്‍ പെണ്‍കുട്ടിയോട് ചേര്‍ന്ന് നില്ക്കും. പെണ്‍കുട്ടി മാറിനിന്നാലും ഇയാള്‍ അടുത്തെത്തും. ഒന്നുരണ്ടു പ്രാവശ്യം പെണ്‍കുട്ടി മുന്നറിയിപ്പ് നല്കിയെങ്കിലും ഇയാള്‍ പിന്മാറാന്‍ തയാറായില്ല. കഴിഞ്ഞദിവസം ടിക്കറ്റ് നല്കി പണം വാങ്ങുമ്പോള്‍ ഇയാളുടെ കൈ പെണ്‍കുട്ടിയുടെ മാറത്ത് മുട്ടുകയായിരുന്നു. ഇതേ തുടര്‍ന്ന് പെണ്‍കുട്ടി വീട്ടില്‍ വിവരമറിയിച്ചു. തുടര്‍ന്നാണ് പിതാവ് വെള്ളൂര്‍ പോലീസില്‍ വിവരം അറിയിച്ചത്. പോലീസ് എത്തി പെണ്‍കുട്ടിയുടെ മൊഴി രേഖപ്പെടുത്തിയശേഷം ഇയാളെ പിടികൂടുകയായിരുന്നു. ബസ് കുഴിയില്‍ വീണപ്പോള്‍ അറിയാതെ കൈ മുട്ടിയതാണെന്നാണ് കണ്ടക്ടറുടെ വിശദീകരണം.
