തിരുവനന്തപുരം : പാർട്ടി സെമികേഡറായില്ലെങ്കിലും മാറ്റത്തിന്റെ മുഖം പ്രകടിപ്പിക്കുന്ന വിധത്തിലായിരുന്നു കോൺഗ്രസിന്റെ 137-ാം ജന്മദിനാഘോഷം. കെ.പി.സി.സി ആസ്ഥാനത്ത് സേവാദൾ വൊളന്റിയർമാർ നൽകിയ ഗാർഡ് ഓഫ് ഓണർ സ്വീകരിച്ച ശേഷമാണ് പ്രസിഡന്റ് കെ.സുധാകരൻ എം.പി പതാക ഉയർത്താനെത്തിയത്. പ്രവർത്തകരുടെ വൈകാരികത പ്രകാശിപ്പിക്കുന്ന വിധത്തിൽ 137-ാം വാർഷികദിനത്തിൽ പാർട്ടി ഫണ്ടിലേക്ക് 137 രൂപ ചലഞ്ചും കോൺഗ്രസ് പ്രഖ്യാപിച്ചു. കോൺഗ്രസ് കൊടിയേന്തിയ പ്രവർത്തകർ ഇന്ത്യയുടെ ഭൂപടത്തിനു ചുറ്റം നിന്ന് കെ.സുധാകരൻ ചൊല്ലിക്കൊടുത്ത പ്രതിജ്ഞ ഏറ്റുചൊല്ലി. ഡി.സി.സി., ബ്ലോക്ക്, മണ്ഡലം കോൺഗ്രസ് കമ്മിറ്റികളുടെയും പുതുതായി രൂപംകൊണ്ട സി.യു.സി കളുടെയും വിപുലമായ പരിപാടികളോടെയാണ് സ്ഥാപകദിനാഘോഷം സംഘടിപ്പിച്ചത്. മണ്ഡലം കോൺഗ്രസ് കമ്മിറ്റികളുടെ നേതൃത്വത്തിൽ സി.യു.സി തലത്തിൽ ജന്മദിനപദയാത്രകൾ നടത്തി. മൂന്ന് പദയാത്രകൾ കെ.പി.സി.സി. ആസ്ഥാനത്ത് എത്തിയശേഷം അവിടെ സ്ഥാപകദിനാഘോഷങ്ങൾക്ക് തുടക്കമായി.
പണമടയ്ക്കാനുള്ള ക്യു.ആർ കോഡ് പ്രകാശനം ചെയ്ത് 137 രൂപ ചലഞ്ചിന്റെ സംസ്ഥാനതല ഉദ്ഘാടനം കെ.സുധാകരൻ നിർവഹിച്ചു. മുൻ പ്രതിപക്ഷനേതാവ് രമേശ് ചെന്നിത്തല ആദ്യ സംഭാവന നൽകി. ലോകത്തിന്റെ ഏതുഭാഗത്തുനിന്നും സംഭാവന കൈമാറാവുന്ന വിധത്തിലാണ് 137 ചലഞ്ച് ഒരുക്കിയിട്ടുള്ളത്. ക്യു ആർ കോഡ് സ്കാൻചെയ്ത് യു.പി.ഐ വഴിയോ മറ്റു സമാന ഡിജിറ്റൽ പേയ്മെന്റ് വാലറ്റ് വഴിയോ ഈ ചലഞ്ചിന്റെ ഭാഗമാകാം. കോൺഗ്രസ് നേതാവും മുൻ എം.എൽ.എ യുമായ ഡി.സുഗതൻ രചിച്ച ‘ഇന്ത്യയും ഇന്ത്യൻ നാഷണൽ കോൺഗ്രസും’ എന്ന ചരിത്രപുസ്തകത്തിന്റെ പ്രകാശനവും ചടങ്ങിൽ നടന്നു.
