തലശ്ശേരി : മഞ്ഞോടിയിലെ കോണ്ഗ്രസ് പ്രവര്ത്തകന് പാണ്ടിയില് വീട്ടില് രവീന്ദ്രന്റെ ദുരൂഹമരണം സംബന്ധിച്ച അന്വേഷണം ക്രൈംബ്രാഞ്ച് ഏറ്റെടുത്തു.ക്രൈംബ്രാഞ്ച് കണ്ണൂര് സെല് എ.സി.പി ടി.പി പ്രേമരാജിനാണ് അന്വേഷണച്ചുമതല. നേരത്തെ കേസന്വേഷിച്ച ലോക്കല് പോലീസില്നിന്ന് ക്രൈംബ്രാഞ്ച് ഉദ്യോഗസ്ഥര് ഫയലുകള് ഏറ്റുവാങ്ങി. രവീന്ദ്രന്റെ ദുരൂഹമരണം കൊലപാതകമാണെന്ന് കോണ്ഗ്രസ് നേരത്തെ ആരോപണമുന്നയിച്ചിരുന്നു. കഴിഞ്ഞ നവംബര് മൂന്നിന് പുലര്ച്ചെ താമസിക്കുന്ന വീടിനോട് ചേര്ന്നുള്ള ശുചിമുറിക്കടുത്താണ് രവിയുടെ മൃതദേഹം കണ്ടെത്തിയത്. കഴുത്തില് പരിക്കേറ്റ പാടുകളുണ്ടായിരുന്നു. മരണം സ്വാഭാവികമല്ലെന്നും കൊലപാതകമാകാന് സാധ്യതയുണ്ടെന്നും മൃതദേഹം പോസ്റ്റ്മോര്ട്ടം നടത്തിയ ഡോക്ടര് വെളിപ്പെടുത്തിയിരുന്നു.
ഇതിന്റെ അടിസ്ഥാനത്തില് തലശ്ശേരി പോലീസ് കോടതിയില് റിപ്പോര്ട്ട് നല്കിയിരുന്നു. മരിച്ച രവീന്ദ്രന്റെ ഭാര്യ, ബന്ധുക്കള്, അയല്വാസികള് തുടങ്ങിയവരെ പോലീസ് ചോദ്യം ചെയ്തിരുന്നെങ്കിലും നിര്ണായക വിവരമൊന്നും ലഭിച്ചിരുന്നില്ല. മരണത്തില് ദുരൂഹത ഉയര്ന്നതിനാല് കണ്ണൂര് സിറ്റി പോലീസ് കമീഷണര് ആര്.ഇളങ്കോയും ഫോറന്സിക് വിദഗ്ധരും ഡോഗ് സ്ക്വാഡും സ്ഥലത്തെത്തി തെളിവെടുപ്പ് നടത്തിയിരുന്നു. തലശ്ശേരി എ.സി.പി വിഷ്ണുപ്രദീപ്, സി.ഐ കെ. സനല്കുമാര് എന്നിവരുടെ നേതൃത്വത്തിലാണ് നേരത്തെ കേസന്വേഷിച്ചത്. രവീന്ദ്രന്റെ മരണവുമായി ബന്ധപ്പെട്ട ദുരൂഹത നീക്കണമെന്ന് ആവശ്യപ്പെട്ട് ഡി.സി.സി മെംബര് കെ. ശിവദാസന് മുഖ്യമന്ത്രിക്കും മറ്റും നിവേദനം നല്കിയിരുന്നു.
