പത്തനംതിട്ട : സി.പി.എം-ന്റെ പാർട്ടി പരിപാടിയിൽ പങ്കെടുക്കാതിരുന്നതിന്റെ പേരിൽ കോൺഗ്രസ് അനുഭാവികളായ തൊഴിൽ ഉറപ്പ് തൊഴിലാളികൾക്ക് പുതുക്കുളം വാർഡിൽ ഉൾപ്പെടെ പഞ്ചായത്തിന്റെ വിവിധ ഭാഗങ്ങളിൽ തൊഴിൽ നിഷേധിക്കുകയും മാനസികമായി പീഡിപ്പിക്കുകയും ചെയ്ത നടപടിയിൽ പ്രതിഷേധിച്ച് മണ്ഡലം കോൺഗ്രസ് കമ്മിറ്റിയുടെ നേതൃത്വത്തിൽ മലയാലപ്പുഴ ഗ്രാമ പഞ്ചായത്ത് ഓഫീസിന് മുമ്പിൽ ധർണ്ണ നടത്തി.
ഡി.സി.സി ജനറൽ സെക്രട്ടറി സാമുവൽ കിഴക്കുപുറം ധർണ്ണ ഉദ്ഘാടനം ചെയ്തു. മണ്ഡലം പ്രസിഡന്റ് ദിലീപ്കുമാർ പൊതീപ്പാട് അദ്ധ്യക്ഷത വഹിച്ചു. ബ്ലോക്ക് ജനറൽ സെക്രട്ടറി പ്രമോദ് താന്നിമൂട്ടിൽ, മണ്ഡലം വൈസ് പ്രസിഡന്റ് ശശീധരൻനായർ പാറയരുകിൽ, ഗ്രാമ പഞ്ചായത്ത് അംഗങ്ങളായ എലിസബത്ത് രാജു, ബിന്ദു ജോർജ്ജ്, ആശാകുമാരി പെരുമ്പ്രാൽ, വാർഡ് പ്രസിഡന്റുമാരായ സാബു പുതുക്കുളം, ഏബ്രഹാം മാത്യു, തുളസീധരൻ നായർ എന്നിവർ പ്രസംഗിച്ചു.
