തിരുവനന്തപുരം : നിയമസഭയിലേക്ക് രണ്ടിലേറെ തവണ തുടര്ച്ചയായി മത്സരിച്ച് തോറ്റവര്ക്കും കഴിഞ്ഞ തദ്ദേശഭരണ തെരഞ്ഞെടുപ്പില് തോറ്റവര്ക്കും ഇത്തവണ സീറ്റ് നല്കേണ്ടെന്ന് കോണ്ഗ്രസ് തീരുമാനം. പാര്ട്ടി മത്സരിക്കുന്ന ആകെ സീറ്റില് 50 ശതമാനത്തിലേറെ യുവാക്കള്ക്കും പുതുമുഖങ്ങള്ക്കും വനിതകള്ക്കുമായി നല്കുന്നതിനും തെരഞ്ഞെടുപ്പ് മേല്നോട്ടസമിതി തീരുമാനിച്ചതായി സമിതി ചെയര്മാന് ഉമ്മന് ചാണ്ടി അറിയിച്ചു.
കോണ്ഗ്രസ് കരട് സ്ഥാനാര്ഥി പട്ടിക തയ്യാറായിട്ടുണ്ട്. ഓരോ സീറ്റിലേക്കും ഒന്നിലേറെ പേരുകള് ഉള്പ്പെടുന്ന പാനലാണ് തയ്യാറാക്കിയിട്ടുള്ളത്. വിജയസാധ്യതയാണ് സ്ഥാനാര്ഥി നിര്ണയത്തില് മുഖ്യഘടകം. അതിനനുസൃതമായാവും അന്തിമപട്ടിക. എ.ഐ.സി.സി നിയോഗിച്ച സ്ക്രീനിങ് കമ്മിറ്റി യോഗം ശനിയാഴ്ച തിരുവനന്തപുരത്ത് ചേര്ന്ന് പ്രാഥമിക വിലയിരുത്തല് നടത്തും.
എന്നാല് വിശദമായ ചര്ച്ചക്ക് സമയം ലഭിക്കാത്തതിനാല് സ്ക്രീനിങ് കമ്മിറ്റി അടുത്തയാഴ്ച ആദ്യം ഡല്ഹിയില് യോഗം ചേര്ന്ന് സ്ഥാനാര്ഥി പട്ടികക്ക് രൂപം നല്കും. തുടര്ന്ന് കേന്ദ്ര തെരഞ്ഞെടുപ്പ് സമിതി ചേര്ന്ന് പട്ടികക്ക് അന്തിമ അംഗീകാരം നല്കും. സീറ്റ് വിഭജനത്തില് ഘടകകക്ഷികളുമായുള്ള ചര്ച്ച അന്തിമഘട്ടത്തിലാണ്. നാളെയോടെ സീറ്റ് വിഭജനം പൂര്ത്തിയാകും.
