ന്യൂഡല്‍ഹി: പാര്‍ട്ടി ജില്ലാ പ്രസിഡന്റുമാരുടെ ദേശീയ സമ്മേളനം നടത്താന്‍ കോണ്‍ഗ്രസ് തീരുമാനം. 2009ന് ശേഷം ആദ്യമായാണ് പാര്‍ട്ടി ജില്ലാ പ്രസിഡന്റുമാരുടെ സമ്മേളനം നടത്തുന്നത്. പാര്‍ട്ടിയില്‍ ഘടനാപരമായ മാറ്റങ്ങള്‍ കൊണ്ടുവരുന്നതിന്റെ ഭാഗമായാണ് സമ്മേളനം. സംഘടനയുടെ പ്രവര്‍ത്തനം താഴേത്തട്ടില്‍ കൂടുതല്‍ സജീവമാക്കാനുള്ള ഒരുക്കത്തിലാണ് ദേശീയ നേതൃത്വം. പാര്‍ട്ടി പ്രവര്‍ത്തനത്തിന്റെ കേന്ദ്രമായി ജില്ലാ കമ്മിറ്റികളെ മാറ്റാനാണ് ആലോചിക്കുന്നത്. പാര്‍ട്ടിയില്‍ തീരുമാനമെടുക്കുന്നതിനുള്ള ഘടന കൂടുതല്‍ വികേന്ദ്രീകൃതമാക്കുന്നതിന്റെ ആദ്യ ഘട്ടമായാണ് ഡിസിസി പ്രസിഡന്റുമാരുടെ സമ്മേളനം.
ഏപ്രില്‍ എട്ട്, ഒമ്പത് തീയതികളില്‍ അഹമ്മദാബാദില്‍ നടക്കുന്ന എഐസിസി സമ്മേളനത്തിന് മുമ്പ് ഡിസിസി പ്രസിഡന്റുമാരുടെ സമ്മേളനം നടത്താനായിരുന്നു നേരത്തെ ആലോചിച്ചിരുന്നത്. എന്നാല്‍ പല ജില്ലകളിലും ഇപ്പോഴും പുതിയ പ്രസിഡന്റുമാരുടെ തെരഞ്ഞെടുപ്പ് പൂര്‍ത്തിയായിട്ടില്ല. ഈ സാഹചര്യത്തില്‍ സമ്മേളനം നീട്ടിവെക്കാനാണ് സാധ്യത. കേരളം, കര്‍ണാടക, ഹരിയാന തുടങ്ങിയ സംസ്ഥാനങ്ങളിലാണ് പുതിയ ഡിസിസി പ്രസിഡന്റുമാരെ നിയമിക്കുന്നത്. ഹരിയാനയില്‍ ഒരു പതിറ്റാണ്ടിലധികമായി ബ്ലോക്ക്, ജില്ലാ കമ്മിറ്റികള്‍ നിര്‍ജീവമാണ്. 2009ല്‍ നടത്തിയ ഡിസിസി പ്രസിഡന്റുമാരുടെ സമ്മേളനം വലിയ വിജയമായിരുന്നുവെന്ന് ഒരു മുതിര്‍ന്ന നേതാവ് പ്രതികരിച്ചു.
താഴേത്തട്ടില്‍ പ്രവര്‍ത്തനം സജീവമായതാണ് യുപിഎ സര്‍ക്കാരിനെ അധികാരത്തില്‍ തിരിച്ചെത്താന്‍ സഹായിച്ചത്. കഴിഞ്ഞ ഡിസംബറില്‍ ചേര്‍ന്ന കോണ്‍ഗ്രസ് വര്‍ക്കിങ് കമ്മിറ്റി യോഗത്തില്‍ ജില്ലാ ഘടകങ്ങളെ ശക്തിപ്പെടുത്തേണ്ടതിന്റെ ആവശ്യകത പ്രതിനിധികള്‍ ചൂണ്ടിക്കാട്ടിയിരുന്നു. പാര്‍ട്ടിയുടെ ഘടനയില്‍ നിര്‍ണായക മാറ്റങ്ങള്‍ വരുത്തി താഴേത്തട്ടില്‍ കൂടുതല്‍ സജീവമാകാനാണ് തീരുമാനം. ഡല്‍ഹി കേന്ദ്രീകരിച്ച് തീരുമാനങ്ങളെടുക്കുന്നതിന് നിലവില്‍ ആര്‍എസ്എസ്-ബിജെപി പ്രവര്‍ത്തന രീതിയെ നേരിടുന്നതിന് പര്യാപ്തമല്ലെന്ന് നേതൃത്വത്തിന്റെ വിലയിരുത്തല്‍.
