പത്തനംതിട്ട : തദ്ദേശ സ്വയംഭരണ സ്ഥാപന തിരഞ്ഞെടുപ്പിൽ കോൺഗ്രസ് നേതൃത്വത്തിൽ യു.ഡി.എഫിന് ജില്ലയിൽ ഉണ്ടായ ഉജ്ജ്വല വിജയത്തിൻ ആഹ്ലാദം പ്രകടിപ്പിച്ച് ഡി.സി.സി നേതൃത്വത്തിൽ നാളെ (2026 ജനുവരി 12 ) പത്തനംതിട്ടയിൽ സംഘടിപ്പിക്കുന്ന വിജയോത്സവ റാലിയുടേയും സ്വീകരണ സമ്മേളനത്തിന്റേയും ഒരുക്കങ്ങൾ പൂർത്തിയായതായി ഡി.സി.സി സംഘടനാകാര്യ ജനറൽ സെക്രട്ടറി സാമുവൽ കിഴക്കപുറം പറഞ്ഞു. വൈകിട്ട് 4.30-ന് സെന്റ് പീറ്റേഴ്സ് ജംഗ്ഷനിൽ നിന്നും ആരംഭിക്കുന്ന റാലിക്ക് ശേഷം പത്തനംതിട്ട പഴയ സ്വകാര്യ ബസ് സ്റ്റാന്റിൽ ചേരുന്ന വിജയികളായ ത്രിതല പഞ്ചായത്ത്, മുനിസിപ്പൽ ജനപ്രതിനിധികൾക്ക് ഡി.സി.സി പ്രസിഡന്റ് പ്രൊഫ.സതീഷ് കൊച്ചു പറമ്പിലിന്റെ അദ്ധ്യക്ഷതയിൽ ചേരുന്ന സ്വീകരണ സമ്മേളനം എ.ഐ.സി.സി സംഘടനാകാര്യ ജനറൽ സെക്രട്ടറി കെ.സി.വേണുഗോപാൽ എം.പി ഉദ്ഘാടനം ചെയ്യും.
യു.ഡി.എഫ് സംസ്ഥാന കൺവീനർ അഡ്വ. അടൂർ പ്രകാശ്, കെ.പി.സി.സി കോർ കമ്മിറ്റി അംഗം പ്രൊഫ.പി.ജെ കുര്യൻ, രാഷ്ട്രീയകാര്യ സമിതി അംഗങ്ങളായ ആന്റോ ആന്റണി എം.പി, പന്തളം സുധാകരൻ, വൈസ് പ്രസിഡന്റ് മാത്യു കുഴൽ നാടൻ എം.എൽ.എ , ജനറൽ സെക്രട്ടറിമാരായ പി.മോഹൻരാജ്, പഴകുളം മധു , എൻ ഷൈലജ്, മറ്റ് നേതാക്കൾ എന്നിവർ പ്രസംഗിക്കും. വിജയോത്സവം വൻ വിജയമാക്കുവാൻ ഡി.സി.സി നേതൃത്വത്തിലുള്ള ഒരുക്കങ്ങൾ പൂർത്തീകരിച്ചു. പഴയ സ്വകാര്യ ബസ് സ്റ്റാന്റിൽ കൂറ്റൻ സ്റ്റേജ്,പന്തൽ നിർമ്മാണം പൂർത്തീകരിച്ചു. നഗരം കൊടി തോരണങ്ങളാൻ അലംകൃതമായിട്ടുണ്ട്. ജില്ലയിലെ 75 മണ്ഡലങ്ങളിൽ നിന്ന് ബൂത്ത്, വാർഡ് കമ്മിറ്റികളുടെ നേതൃത്വത്തിൽ നൂറ് കണക്കിന് കോൺഗ്രസ് പ്രവർത്തകർ പങ്കെടുക്കുമെന്ന് ഡി.സി.സി നേതാക്കൾ അറിയിച്ചു.
