തിരുവനന്തപുരം : സംസ്ഥാനത്തെ കൊവിഡ് 19 ഹോ‌ട്ട് സ്പോട്ട് മേഖലകളില്‍നിന്ന് ഏത് രോഗത്തിനു ചികിത്സ തേടിയാലും കൊവിഡ് പരിശോധന നടത്താന്‍ തീരുമാനം. രോഗലക്ഷണങ്ങള്‍ ഇല്ലാത്തവരിലും വൈറസ് ബാധയുണ്ടോയെന്ന് അറിയാനാണ് പരിശോധന നടത്തുന്നത്. നേരത്തെ കൊവിഡ് ലക്ഷണങ്ങള്‍ ഇല്ലാത്തവരിലും രോഗം സ്ഥിരീകരിച്ചിരുന്നു.
ഹോട്ട്സ്പോട്ട് പ്രദേശങ്ങളില്‍ നിന്ന് കൂടുതല്‍ പേരിലേക്ക് രോഗം പടരാനുള്ള സാധ്യത സംസ്ഥാന സര്‍ക്കാര്‍ രൂപീകരിച്ച വിദഗ്ധ സമിതി ചൂണ്ടിക്കാട്ടിയിരുന്നു. സാമൂഹിക വ്യാപന സാധ്യത സര്‍ക്കാര്‍ തള്ളിക്കളയുന്നുണ്ടെങ്കിലും അക്കാര്യത്തിലും പരിശോധന നടത്തണം. ഇതിനായാണ് ഈ മേഖലകളില്‍ നിന്ന് ചികിത്സ തേടുന്ന എല്ലാ രോഗികളേയും പരിശോധനയ്ക്ക് വിധേയരാക്കാന്‍ തീരുമാനിച്ചത്. ശസ്ത്രക്രിയക്ക് എത്തുന്നവരേയും വിദേശത്തു നിന്ന് എത്തുന്നവരെയും പരിശോധന നടത്തും. അതിര്‍ത്തികള്‍ വഴി കേരളത്തിലേക്കെത്തുന്നവരേയും പരിശോധനയ്ക്ക് വിധേയരാക്കും.
