പത്തനംതിട്ട : കോവിഡ് രോഗവ്യാപനത്തിന്റെ മറവില് സാധനങ്ങള്ക്ക് അമിതമായി വില വര്ധിപ്പിക്കുന്നത് മൂലം നിര്മ്മാണ മേഖല വീണ്ടും പ്രതിസന്ധിയിലായി. തൊഴിലാളികളുടെ അഭാവവും ജില്ലയിലെ പല പ്രദേശങ്ങളും കണ്ടെയ്ന്മെന്റ് സോണാകുന്നതും പ്രതിസന്ധി രൂക്ഷമാക്കുന്നു.
ലോക്ഡൗണ് ഇളവുകളും കാലവര്ഷത്തിനിടയില് ലഭിച്ച അനുകൂല കാലാവസ്ഥയും ഉപയോഗപ്പെടുത്തിയാണ് പല കരാറുകാരും പ്രവൃത്തികള് പുനരാരംഭിച്ചത്. അത്യാവശ്യമായി പൂര്ത്തീകരിക്കേണ്ട ഓട, കലുങ്ക്, പാലം എന്നിവയുടെ പ്രവൃത്തികള് പലയിടത്തും തുടങ്ങിയിട്ടുണ്ട്. പൊളിച്ചിട്ട റോഡുകളുടെ നിര്മാണവും ആരംഭിച്ചിട്ടുണ്ട്. എന്നാല് സിമെന്റ് ഉള്പ്പെടെയുടെയുള്ള നിര്മ്മാണ സാധനങ്ങള്ക്ക് 50 മുതല് 100 രൂപയോളമാണ് ഒരുപാക്കറ്റില് വര്ധിപ്പിച്ചിരിക്കുന്നത്. ടാര് വിലയും ഗണ്യമായി വര്ധിച്ചു. ഇത് കരാറുകാരെയും വ്യാപാരികളെയും ജനങ്ങളെയും ഒരു പോലെ ബാധിച്ചിരിക്കുകയാണ്.
