തൊടുപുഴ: ജില്ലയിലെ ഹോട്ടലുകള്‍, ബേക്കറികള്‍, തട്ടുകടകള്‍ തുടങ്ങിയ സ്ഥാപനങ്ങളില്‍ ഭക്ഷ്യ എണ്ണയുടെ പുനരുപയോഗം തടയാന്‍ ഭക്ഷ്യസുരക്ഷ വകുപ്പ് പരിശോധന തുടങ്ങി. നാലു ദിവസമായി 58 സ്ഥാപനങ്ങളില്‍ ഉദ്യോഗസ്ഥര്‍ പരിശോധന നടത്തി. പഴകിയ എണ്ണ വീണ്ടും ഉപയോഗിച്ച രണ്ട് സ്ഥാപനങ്ങള്‍ക്ക് 10,000 രൂപ പിഴ ചുമത്തി. മൂന്ന് സ്ഥാപനങ്ങള്‍ക്ക് ഇംപ്രൂവ്മെന്‍റ് നോട്ടീസ് നല്‍കി. എട്ട് സാമ്പിളുകള്‍ കൂടുതല്‍ പരിശോധനക്കായി എടുത്തിട്ടുണ്ട്.ജില്ലയില്‍ നടപ്പാക്കുന്ന റൂക്കോ (റീ പര്‍പ്പസ് യൂസ്ഡ് കുക്കിങ് ഓയില്‍) പദ്ധതിയുടെ ഭാഗമായാണ് പരിശോധന. ബേക്കറി, ബോര്‍മ, ഹോട്ടല്‍, തട്ടുകടകള്‍ എന്നിവിടങ്ങളിലൊക്കെ ഭക്ഷ്യ എണ്ണ ധാരാളമായി ഉപയോഗിക്കുന്നുണ്ട്. ഉപയോഗിച്ച എണ്ണ പലതവണ ചൂടാക്കി ഉപയോഗിക്കുന്നുവെന്ന പരാതികളുടെ അടിസ്ഥാനത്തിലാണ് നടപടി ശക്തമാക്കിയത്.
വീണ്ടും ഉപയോഗിക്കാന്‍ സാധിക്കാത്ത എണ്ണ കാറ്ററിങ് യൂണിറ്റുകള്‍, ഹോട്ടലുകള്‍, ബേക്കറികള്‍ എന്നിവിടങ്ങളില്‍നിന്ന് ശേഖരിക്കുകയാണ് പദ്ധതികൊണ്ട് ലക്ഷ്യമാക്കുന്നത്. ജില്ലയില്‍ ട്രൈക്കോയുടെ നേതൃത്വത്തിലാണ് യൂസ്ഡ് എണ്ണകള്‍ ശേഖരിക്കുന്നത്. ഈ പദ്ധതി പ്രകാരം സ്ഥാപനങ്ങളില്‍നിന്ന് ഒരു നിശ്ചിത തുക നല്‍കി പുനരുപയോഗ യോഗ്യമല്ലാത്ത എണ്ണ ശേഖരിക്കുകയും അത് ഭക്ഷ്യസുരക്ഷ അതോറിറ്റിയുമായി കരാറില്‍ ഏര്‍പ്പെട്ടിട്ടുള്ള ബയോഡീസല്‍ കമ്പനികള്‍ക്ക് നല്‍കുകയുമാണ് ചെയ്യുന്നത്. പുനരുപയോഗ യോഗ്യമല്ലാതെ പുറംതള്ളിയ എണ്ണയുടെ കണക്ക് രേഖപ്പെടുത്തിയ രജിസ്റ്ററും എണ്ണ ശേഖരിക്കുന്ന ഏജന്‍സിയെ സംബന്ധിച്ച വിവരങ്ങളും സ്ഥാപനങ്ങളില്‍ സൂക്ഷിക്കണമെന്നും സ്ഥാപനങ്ങള്‍ക്ക് നിര്‍ദേശം നല്‍കിയിട്ടുണ്ട്. തൊടുപുഴ, അടിമാലി, കട്ടപ്പന, നെടുങ്കണ്ടം, പീരുമേട് എന്നിവിടങ്ങളില്‍ നടന്ന പരിശോധനയില്‍ ഭക്ഷ്യസുരക്ഷ ഉദ്യോഗസ്ഥരായ എം.എന്‍. ഷംസിയ, ബൈജു പി. ജോസഫ്, ആന്‍മേരി ജോണ്‍സണ്‍, എസ്. പ്രശാന്ത് എന്നിവര്‍ പങ്കെടുത്തു.
