കൊറോണ ; പത്തനംതിട്ടയില്‍ മാസ്കും സാനിട്ടയിസറും കിട്ടാനില്ല ; ഉള്ളതിന് തീവില

പത്തനംതിട്ട : അഞ്ചുപേര്‍ക്ക് കൊറോണ വൈറസ് സ്ഥിരീകരിച്ചതോടുകൂടി പത്തനംതിട്ടയിലെ ജനങ്ങള്‍ പരിഭ്രാന്തിയിലാണ്. മിക്കവരും യാത്രകള്‍ ഒഴിവാക്കി വീടുകളിലേക്ക് വലിഞ്ഞു. പൊതു പരിപാടികളൊക്കെ റദ്ദ് ചെയ്തു. അതോടൊപ്പം തന്നെ കൊറോണ പ്രതിരോധത്തിനുള്ള മാസ്ക്കുകള്‍ എങ്ങും കിട്ടാനില്ല. കൈതുടക്കാനുള്ള സാനിട്ടയിസറിനും കടുത്ത ക്ഷാമം നേരിട്ടുകഴിഞ്ഞു.

കഴിഞ്ഞ ദിവസംവരെ എട്ടു രൂപക്ക് വിറ്റിരുന്ന സാധാരണ മാസ്കിന്  ഇപ്പോള്‍ ഇരുപതു മുതല്‍ മുപ്പതു രൂപവരെ വാങ്ങുകയാണ്. അതും ഇപ്പോള്‍ കിട്ടാനില്ല. രോഗം സ്ഥിരീകരിച്ചവരും രോഗിയുമായി അടുത്തിടപഴകുന്നവരും ധരിക്കുന്ന N 95 മാസ്കിന്റെ വില 100 രൂപയില്‍ നിന്നും 250 ലേക്ക് കയറി. മൊത്തക്കച്ചവടക്കാര്‍ ഒറ്റയടിക്ക് വില കൂട്ടിയതാണ് മാസ്കിന് വില കൂടുവാന്‍ കാരണമെന്ന് മെഡിക്കല്‍ സ്റ്റോര്‍ ഉടമകള്‍ പറയുന്നു. വിദ്യാര്‍ത്ഥികള്‍ മാസ്ക് ധരിച്ചുകൊണ്ട് വേണം നാളെ മുതല്‍ സ്കൂളുകളില്‍ എത്തുവാന്‍. ഇത് സംബന്ധിച്ച നിര്‍ദ്ദേശങ്ങള്‍ സ്കൂള്‍ അധികൃതര്‍ നല്‍കിത്തുടങ്ങി. ഇതോടെ പത്തനംതിട്ട ജില്ലയുടെ സമീപ പ്രദേശങ്ങളിലും മാസ്കിന് കടുത്ത ക്ഷാമം നേരിടുമെന്ന് ഉറപ്പായിക്കഴിഞ്ഞു.  ജില്ലാ ഭരണകൂടത്തിന്റെ അടിയന്തിര ഇടപെടല്‍ ഇക്കാര്യത്തില്‍ ഉണ്ടാകേണ്ടിയിരിക്കുന്നു.