കൊച്ചി: കൊവിഡ് ബാധിച്ച് കളമശ്ശേരി മെഡിക്കല്‍ കോളജ് ഐസൊലേഷന്‍ ഐസിയുവിലുള്ള യുകെ പൗരന് എച്ച്ഐവി മരുന്ന് ഉപയോഗിച്ച് ചികിത്സയാരംഭിച്ചു. കൊറോണ ബാധിതരായ രോഗികളിൽ എച്ച്ഐവി മരുന്ന് ഫലപ്രദമാണെന്ന് നേരത്തെ വിദഗ്ധാഭിപ്രായം വന്നിരുന്നു. സംസ്ഥാന മെഡിക്കൽ ബോർഡിന്‍റെയും രോഗിയുടെയും അനുമതിയോടെയാണ് എച്ച്ഐവി മരുന്നുപയോഗിച്ചുള്ള ചികിത്സ. റിട്ടോണാവിര്‍, ലോപിനാവിര്‍ എന്നീ മരുന്നുകളാണ് യുകെ പൗരന് നല്‍കുന്നത്.
എച്ച്‌ഐവിക്കുള്ള മരുന്നുകള്‍ കൊവിഡ് ബാധിതരുടെ രോഗവിമുക്തി വേഗത്തിലാക്കുമെന്ന നിഗമനത്തിന്റെ കൂടി അടിസ്ഥാനത്തിലാണിത്. എച്ച്ഐവി മരുന്ന് കൊറോണ രോഗികൾക്ക് നൽകുന്നതിൽ ഇന്ത്യന്‍ കൗണ്‍സില്‍ ഫോര്‍ മെഡിക്കല്‍ റിസര്‍ച്ചിന്റെ അനുമതി തേടിയിരുന്നെന്നും റിപ്പോർട്ടുകൾ വ്യക്തമാക്കുന്നുണ്ട്. ചികിത്സയിലുള്ള യുകെ പൗരന് ന്യൂമോണിയ ബാധിച്ചിട്ടുണ്ട്. ഈ സാഹചര്യത്തില്‍ എച്ച്ഐവി മരുന്നുകള്‍ നല്‍കുന്നത് ഗുണപ്രദമാകുമെന്നാണ് വിലയിരുത്തപ്പെടുന്നത്. ജില്ലാ കളക്ടര്‍ ഇടപെട്ടാണ് മരുന്ന് ലഭ്യമാക്കിയതെന്നാണ് റിപ്പോർട്ടുകൾ.
നേരത്തെ ജയ്പൂരിലും എച്ച്ഐവി മരുന്ന് കൊവിഡ് രോഗികൾക്ക് നൽകിയിരുന്നു. ഇറ്റാലിയൻ വയോധിക ദമ്പതികൾക്കായിരുന്നു പരീക്ഷണാടിസ്ഥാനത്തിൽ എച്ച്ഐവി ചികിത്സയ്ക്കുള്ള മരുന്ന് നൽകിയത്. ശ്വാസംമുട്ടലുൾപ്പെടെ അതീവഗുരുതര നിലയിലായിരുന്നു ഇവരിലൊരാൾ. മരുന്ന് നൽകിയിട്ട് പാർശ്വ ഫലങ്ങളുണ്ടായിട്ടില്ലെന്നാണ് റിപ്പോർട്ട്.
