കൊല്ലം : കേരളത്തില് രണ്ട് പേര്ക്ക് കോവിഡ് ബാധിച്ചത് എടിഎം വഴിയെന്ന് ആരോഗ്യവകുപ്പിന്റെ വിലയിരുത്തല്. കൊല്ലം ജില്ലയിലെ കല്ലുവാതുക്കല് മേഖലയിലുള്ള എടിഎം ഉപയോഗിച്ചവര്ക്കാണ് കോവിഡ് ബാധിച്ചത്. രോഗ ഉറവിടം അറിയാതിരുന്ന 166 രോഗികളെക്കുറിച്ച് ആരോഗ്യവകുപ്പ് നടത്തിയ പഠനത്തിലാണ് ഈ കണ്ടെത്തല്.
കല്ലുവാതുക്കലില് ഒരു ആശാവര്ക്കര്ക്ക് കോവിഡ് പകര്ന്നത് എടിഎം കൗണ്ടര് വഴിയാണെന്നാണ് നിഗമനം. തൊട്ടടുത്ത ചാത്തന്നൂര് ക്ലസ്റ്ററില്പ്പെട്ട ഒരു രോഗി സന്ദര്ശിച്ച എടിഎമ്മില് ഇവരും എത്തിയിരുന്നു. ഇതേ എടിഎം ഉപയോഗിച്ച മറ്റൊരാള്ക്കും രോഗം സ്ഥിരീകരിച്ചിട്ടുണ്ട്. ഇയാളില് നിന്ന് ഭാര്യയ്ക്കും അഞ്ച് മാസം പ്രായമുള്ള കുഞ്ഞിനും രോഗം പിടിപെട്ടു. ഇയാളുടെ കാര്യത്തില് കൂടുതല് സ്ഥിരീകരണം ആവശ്യമുണ്ടെന്നും ആരോഗ്യവകുപ്പ് അറിയിച്ചു.
ജൂണ് 30 വരെ തുടക്കത്തില് ഉറവിടം കണ്ടെത്താനാകാതിരുന്ന 166 പേരില് 125 പേരുടെ രോഗ ഉറവിടം കണ്ടെത്തിയിട്ടുണ്ട്. ബാക്കി 41 പേരെ കുറിച്ച് അന്വേഷണം തുടരുകയാണ്.
ബ്രേക്ക് ദ ചെയിന് ക്യാമ്പയിന്റെ ആദ്യ ഘട്ടത്തില് ബാങ്കുകളിലും എടിഎമ്മുകളിലും സൂപ്പര്മാര്ക്കറ്റുകളിലും മറ്റ് പ്രധാന ഇടങ്ങളിലുമെല്ലാം സാനിറ്റൈസറുകളും കൈകഴുകാനുള്ള സംവിധാനങ്ങളും ഒരുക്കിയിരുന്നു.
