കോഴിക്കോട് : വീടിന്റെ പ്ലാന് ക്രമപ്പെടുത്താനായി കെ.എം ഷാജി എം.എല്.എ നല്കിയ അപേക്ഷ തള്ളി. കോഴിക്കോട് കോര്പ്പറേഷനാണ് അപേക്ഷ തള്ളിയത്. പിഴവുകള് തിരുത്തി വീണ്ടും അപേക്ഷിക്കണമെന്ന് സെക്രട്ടറി അറിയിച്ചു.
അനധികൃത നിര്മാണം കണ്ടെത്തിയ നഗരസഭ ഷാജിക്ക് നോട്ടീസ് നല്കിയിരുന്നു. കോഴിക്കോട് മാലൂര്കുന്നിലെ ഷാജിയുടെ വീട് ഇ.ഡിയുടെ ആവശ്യപ്രകാരം കോര്പ്പറേഷന് അളവെടുത്തപ്പോഴാണ് അനധികൃത നിര്മാണം ശ്രദ്ധയില്പ്പെട്ടത്. അനുമതിയില്ലാതെ 2,300 ചതുരശ്ര അടിയില് നിര്മാണം നടത്തിയിട്ടുണ്ടെന്നാണ് കണക്കാക്കുന്നത്. കെ.എം ഷാജിയുടെ വീട് ക്രമപ്പെടുത്താനുള്ള അപേക്ഷ പരിഗണിക്കുമെന്ന് കോഴിക്കോട് കോര്പ്പറേഷന് നേരത്തേ വ്യക്തമാക്കിയിരുന്നു. ഇത് ക്രമപ്പെടുത്താന് 1.38 ലക്ഷം നികുതിയും 15,000 രൂപ പിഴയും അടക്കേണ്ടി വരുമെന്ന സൂചന കോര്പ്പറേഷന് അധികൃതര് നല്കിയിരുന്നു.
