പത്തനംതിട്ട : പുനലൂര് – മൂവാറ്റുപുഴ സംസ്ഥാന പാതയിലെ പ്ലാച്ചേരി മുതല് കോന്നി വരെയുള്ള റീച്ചില് നിരന്തരമായി അപകടങ്ങള് നടക്കുന്ന ഭാഗങ്ങളില് സ്ഥാപിച്ച ഡിവൈഡര് സ്റ്റമ്പുകള് ചുരുങ്ങിയ കാലങ്ങള്ക്കുള്ളില് തന്നെ ഒടിഞ്ഞു തുടങ്ങി. ദിവസവും നൂറുകണക്കിന് വാഹനങ്ങള് ഇടതടവില്ലാതെ സഞ്ചരിക്കുന്ന റോഡില് ഗുണ നിലവാരം തീരെ കുറഞ്ഞ സ്റ്റമ്പുകളാണ് സ്ഥാപിച്ചിട്ടുള്ളത്. വെറും പ്ലാസ്റ്റിക്കില് നിര്മ്മിച്ച ഇത്തരം സ്റ്റമ്പുകള് ഒട്ടും കട്ടിയില്ലാത്തതും അബദ്ധത്തില് വാഹനങ്ങള് കയറിയാല് പൊട്ടി പോകുന്നതുമാണ്. ഇതിന് പകരം റബ്ബര് കൊണ്ട് നിര്മ്മിച്ച സ്റ്റമ്പുകള് ആയിരുന്നുവെങ്കില് വാഹനങ്ങള് തട്ടിയാലും ഒടിയാതെ പൂര്വ്വസ്ഥിതിയില് ആകുമായിരുന്നു.
കുമ്പഴ, മൈലപ്ര, മല്ലശേരിമുക്ക് തുടങ്ങിയ പ്രധാന ജംഗ്ഷനുകളില് അപകടങ്ങള് പതിവായതോടെയാണ് ഇത്തരത്തില് സ്റ്റമ്പുകള് സ്ഥാപിച്ചത്. ഇത് സ്ഥാപിച്ചതിന് ശേഷം വാഹനങ്ങള് തെറ്റായ ദിശയില് കയറി വരുന്നതും അപകടങ്ങള് നടക്കുന്നതും ഒരുപാട് കുറഞ്ഞിരുന്നു. എന്നാല് പലപ്പോഴും ചില വലിയ വാഹനങ്ങള് ഇതിനു മുകളില് കൂടി കയറി ഇറങ്ങിയാണ് റോഡിന് എതിര് ദിശയിലേക്ക് തിരിയുന്നത്. ഗതാഗത നിയമങ്ങള് പാലിക്കുവാനുള്ള സാമാന്യ മര്യാദപോലും കാണിക്കാത്ത ഇത്തരം ആളുകള്ക്ക് എതിരെ നടപടികള് സ്വീകരിക്കുവാനും കഴിഞ്ഞിട്ടില്ല.
പലയിടത്തും ഒടിഞ്ഞുമാറിയ സ്റ്റമ്പുകള് റോഡരികില് കൂട്ടി ഇട്ടിരിക്കുന്ന കാഴ്ചയും കാണാം. സംസ്ഥാന പാതയില് പലയിടത്തും രാത്രിയില് വെളിച്ചം കുറവുള്ളതും ഇത്തരം സംഭവങ്ങള്ക്കും അപകടങ്ങള്ക്കും കാരണമായി തീരുന്നുണ്ട്. സ്റ്റമ്പുകള് ഒടിഞ്ഞു തുടങ്ങിയതോടെ ഇനിയും ഇത്തരം അപകടങ്ങള് ആവര്ത്തിക്കുവാനുള്ള സാധ്യതയും ഏറെയാണ്.
