ജമ്മു : ജമ്മു കശ്മീരിലെ ഇന്റര്നെറ്റ് സേവനവുമായി ബന്ധപ്പെട്ട് കേന്ദ്രസര്ക്കാരിന് എതിരെയുള്ള കോടതിയലക്ഷ്യഹര്ജി സുപ്രീംകോടതി ഇന്ന് പരിഗണിക്കും. ജമ്മു കശ്മീരിലെ ഏതെങ്കിലും മേഖലയില് 4ജി ഇന്റര്നെറ്റ് സേവനം പുനഃസ്ഥാപിക്കാന് കഴിയുമോയെന്ന് അറിയിക്കാന് കഴിഞ്ഞ തവണ കോടതി കേന്ദ്രത്തിന് നിര്ദേശം നല്കിയിരുന്നു.
ജസ്റ്റിസ് എന് വി രമണ അധ്യക്ഷനായ ബെഞ്ചാണ് ഹര്ജികള് പരിഗണിക്കുന്നത്. 4ജി ഇന്റര്നെറ്റ് സേവനം പുനഃസ്ഥാപിക്കുന്നതുമായി ബന്ധപ്പെട്ട് ഉന്നതതല സമിതി രൂപീകരിക്കണമെന്ന കോടതി ഉത്തരവ് കേന്ദ്രം നടപ്പാക്കിയില്ലെന്നാണ് കോടതിയലക്ഷ്യഹര്ജിയിലെ പരാതി. ഫൗണ്ടേഷന് ഫോര് മീഡിയ പ്രൊഫഷണല്സ് സംഘടനയാണ് സുപ്രീംകോടതിയെ സമീപിച്ചത്.
370-ാം അനുഛേദം റദ്ദാക്കിയതിനെ തുടര്ന്ന് ജമ്മു കശ്മീരിലെ നിയന്ത്രണങ്ങള് ഒരു വര്ഷമായി തുടരുകയാണ്. 2ജി ഇന്റര്നെറ്റ് സേവനം പുനഃസ്ഥാപിച്ചെങ്കിലും 4 ജി പുനസ്ഥാപിക്കുന്ന കാര്യത്തില് സുരക്ഷാ പ്രശ്നങ്ങള് ഉണ്ടെന്നാണ് സര്ക്കാരിന്റെ നിലപാട്.
