ന്യൂഡല്ഹി: എയിംസില് ചികിത്സയിലായിരുന്ന മലയാളി മാധ്യമപ്രവര്ത്തകന് സിദ്ദിഖ് കാപ്പനെ മഥുര ജയിലിലേക്ക് മാറ്റിയ നടപടിയില് ഉത്തര് പ്രദേശ് സര്ക്കാരിനെതിരെ കോടതിയലക്ഷ്യ നോട്ടീസ്. സിദ്ദിഖ് കാപ്പന്റെ അഭിഭാഷകനാണ് നോട്ടീസ് അയച്ചത്. ചികിത്സ പൂര്ത്തിയാക്കാതെയാണ് കാപ്പനെ ജയിലിലേക്ക് മാറ്റിയതെന്നും അദ്ദേഹത്തെ തിരികെ എയിംസില് തന്നെ പ്രവേശിപ്പിക്കണമെന്നുമാണ് ആവശ്യം.
ചികിത്സയില് കഴിഞ്ഞിരുന്ന കാപ്പനെ കാണാന് ഭാര്യ ഡല്ഹിയിലെത്തിയെങ്കിലും യു.പി പോലീസും ആശുപത്രി അധികൃതരും അനുവദിച്ചിരുന്നില്ല. ഇതിനിടെയാണ് രഹസ്യമായി വീണ്ടും സിദ്ദിഖ് കാപ്പനെ മഥുര ജയിലിലേക്ക് മാറ്റിയത്. കോവിഡ് മുക്തി നേടിയതോടെയാണ് ജയിലിലേക്ക് മാറ്റിയതെന്നാണ് യു.പി സര്ക്കാരിന്റെ വാദം. എന്നാല് എയിംസില് നടത്തിയ പരിശോധനയില് അദ്ദേഹത്തിന് കേവിഡ് സ്ഥിരീകരിച്ചിരുന്നു. കോവിഡ് നെഗറ്റീവായോ എന്നു പോലും അറിയില്ലെന്നു ഫോണില് കാപ്പന് ഭാര്യ റൈഹാനത്തിനോടു പറഞ്ഞിരുന്നു.
