ദില്ലി : ഭാരത് ബയോടെക് വികസിപ്പിച്ച ഇന്ത്യയുടെ കോവിഡ് വാക്സിനായ കൊവാക്സിന് ഓസ്ട്രേലിയൻ സർക്കാർ അംഗീകാരം നൽകി. യാത്രക്കാർക്കുള്ള വാക്സിൻ എന്ന നിലയിലാണ് ഓസ്ട്രേലിയയുടെ തെറാപ്യൂട്ടിക് ഗുഡ്സ് അഡ്മിനിസ്ട്രേഷൻ കൊവാക്സിന് അംഗീകാരം നൽകിയത്. ഓസ്ട്രേലിയയുടെ ഇന്ത്യയിലേക്കുള്ള ഹൈക്കമ്മീഷണർ ബാരി ഒ ഫാരൽ ആണ് ഇക്കാര്യം ട്വീറ്റ് ചെയ്തത്.
അംഗീകൃത വാക്സിനുകളുടെ പട്ടികയിലാണ് കൊവാക്സിനെ ഉൾപ്പെടുത്തിയിട്ടുള്ളത്. നേരത്തെ ഇന്ത്യയിൽ നിർമ്മിച്ച കോവിഷീൽഡ് വാക്സിന് ഓസ്ട്രേലിയ ഇതേരീതിയിൽ അംഗീകാരം നൽകിയിരുന്നു. നേരത്തെ ഈ വാക്സിൻ ഓസ്ട്രേലിയയുടെ അംഗീകൃത ലിസ്റ്റിൽ ഉൾപ്പെട്ടിരുന്നില്ല. കൊവാക്സിന് ഇതുവരെ ലോകാരോഗ്യ സംഘടനയുടെ അംഗീകാരം ലഭിച്ചിട്ടില്ല. ഉടൻ ലഭിക്കുമെന്ന പ്രതീക്ഷയിലാണ് കൊവാക്സിൻ നിർമ്മാതാക്കളായ ഭാരത് ബയോടെക്.
