ന്യൂഡല്ഹി : ഇന്ത്യയുടെ സ്വന്തം കോവിഡ് വാക്സിന്റെ പരീക്ഷണം ഡല്ഹി എയിംസില് നടത്തി. 30 വയസ്സുള്ള യുവാവിനാണ് കോവാക്സിന്റെ ആദ്യഡോസ് നല്കിയത്. രണ്ടാഴ്ച കഴിഞ്ഞ് രണ്ടാമത്തെ ഡോസ് നല്കുമെന്നും അധികൃതര്. ആദ്യ രണ്ട് മണിക്കൂര് ഇയാള് ഡോക്ടര്മാരുടെ പൂര്ണ നിരീക്ഷണത്തിലായിരിക്കും. വീട്ടിൽ പോയാലും നിരീക്ഷണത്തില് തന്നെ കഴിയണം.
ഐസിഎംആറുമായും നാഷണല് വൈറോളജി ഇന്സ്റ്റ്യൂട്ടുമായി സഹകരിച്ച് ഹൈദരാബാദ് ആസ്ഥാനമായി പ്രവര്ത്തിക്കുന്ന ഭാരത് ബയോടെക് ആണ് കോവിഡിനെതിരെയുള്ള വാക്സിന് വികസിപ്പിച്ചത്.
ഡോ.കൃഷ്ണ ഇല്ലായുടെ നേതൃത്വം നല്കുന്ന ഭാരത് ബയോടെക് 20 വര്ഷത്തോളമായി ഗവേഷണ മേഖലയില് നേട്ടങ്ങള് കൊയ്തുകൊണ്ടിരിക്കുകയാണ്. ബയോ പോളിയോ, എച് എന് വാക്, പേവിഷ ബാധക്കെതിരെയുള്ള ഇന്ദിരാബ്, ജപ്പാന് ജ്വരത്തിനെതിരെയുള്ള ജെന്വാക്, കുഞ്ഞുങ്ങളിലെ വയറിളക്കത്തിനെതിരിയുള്ള റോട്ട വാക് തുടങ്ങി നിരവധി വാക്സിനുകളും അനേകം മരുന്നുകളും വികസിപ്പിച്ചെടുത്തത് ഭാരത് ബയോടെക് ആണ്. ഇത് പൂര്ണ വിജയത്തിലെത്തിയാല് കമ്പനിയുടെ നേട്ടങ്ങളില് ഒന്നു കൂടി എഴുതി ചേര്ക്കാം.
