തിരുവനന്തപുരം : കോവിഡിന്റെ രണ്ടാംഘട്ട വ്യാപനത്തിന്റെ സാധ്യതകള് കണ്ടെത്തുന്നതിനും അനുയോജ്യമായ പ്രതിരോധ തന്ത്രങ്ങള് ആവിഷ്ക്കരിക്കുന്നതിനുമായി സംസ്ഥാന ആരോഗ്യ വകുപ്പ് കോവിഡ്-19 സാന്ദ്രതാ പഠനം നടത്തുമെന്ന് ആരോഗ്യ വകുപ്പ് മന്ത്രി കെ.കെ. ശൈലജ ടീച്ചര് അറിയിച്ചു. സാര്സ് കോവിഡ് 2 ആന്റീബോഡിയുടെ സാന്നിദ്ധ്യം എത്രത്തോളം ആളുകളില് പ്രത്യേകിച്ച് അപകട സാധ്യത കൂടുതലുള്ള ആളുകളില് ഉണ്ട് എന്ന് മനസിലാക്കുകയാണ് ഈ പഠനത്തിന്റെ പ്രധാന ലക്ഷ്യം. രോഗത്തിന്റെ അടുത്തഘട്ട വ്യാപന സാധ്യത മനസിലാക്കുന്നതിനും മുന്നൊരുക്കങ്ങള് നടത്തുവാനും നയപരമായ തീരുമാനങ്ങള് കൈക്കൊളളുന്നതിനും ഈ പഠനം സഹായിക്കുമെന്നും മന്ത്രി വ്യക്തമാക്കി.
ആരോഗ്യ വകുപ്പ് അഡീഷണല് ഡയറക്ടറുടെയും തിരുവനന്തപുരം മെഡിക്കല് കോളേജിലെ പി.ഇ.ഐ.ഡി. സെല് നോഡല് ഓഫീസറുടെയും മേല്നോട്ടത്തിലാണ് ഈ പഠനം നടത്തുന്നത്. ജില്ലാ തലത്തില് ജില്ലാ സര്വൈയ്ലന്സ് ഓഫീസര് ഈ പ്രവര്ത്തനങ്ങള് നടപ്പിലാക്കുകയും ഏകോപിപ്പിക്കുകയും ചെയ്യും. താലൂക്കാശുപത്രികളിലെ സൂപ്രണ്ടായിരിക്കും അതാത് പഠനമേഖലയില് നേതൃത്വം നല്കുന്നത്. ആരോഗ്യ വകുപ്പിലെ ജില്ലാ സര്വൈയ്ലന്സ് ഓഫീസര് തദ്ദേശഭരണ സ്ഥാപനങ്ങളുടെയും പോലീസ് സ്റ്റേഷനുകളുടെയും ലിസ്റ്റ് തയ്യാറാക്കുകയും അതില് നിന്നും 5 വീതം സ്ഥാപനങ്ങളെ ഓരോ ജില്ലയില് നിന്നും പഠനത്തിനായി തെരഞ്ഞെടുക്കുകയും ചെയ്യുന്നു. ഇങ്ങനെ തെരഞ്ഞെടുക്കപ്പെട്ട ഓരോ സ്ഥലങ്ങളില് നിന്നും 12 പേരെ വീതം പരിശോധനയ്ക്ക് വിധേയമാക്കുന്നതാണ്.
