ന്യൂഡല്ഹി: കോവിഡിനെ ചെറുക്കാനുള്ള ഫലപ്രദമായ മരുന്ന് കണ്ടെത്തിയില്ലെങ്കില് 2021 ഫെബ്രുവരിയോടെ ഇന്ത്യയില് പ്രതിദിന കോവിഡ് സ്ഥിരീകരണ കേസുകള് 2.87 ലക്ഷമാകുമെന്ന് മുന്നറിയിപ്പ്. മസാച്യുസെറ്റ്സ് ഇന്സ്റ്റിറ്റ്യൂട്ട് ഓഫ് ടെക്നോളജിയിലെ ഗവേഷകര് നടത്തിയ പഠനത്തിലാണ് ഈ മുന്നറിയിപ്പ്. വാക്സിന്റെ അഭാവത്തില് കോവിഡ് രോഗം ഏറ്റവും മോശമായി ബാധിക്കുന്ന രാജ്യം ഇന്ത്യ ആണെന്നും പഠനത്തില് പറയുന്നു.
ഫലപ്രദമായ പ്രതിരോധമോ ചികിത്സയോ കണ്ടുപിടിച്ചില്ലെങ്കില് അടുത്ത വര്ഷം മാര്ച്ചോടെ ലോകത്താകമാനം 24.9 കോടി കോവിഡ് ബാധിതരുണ്ടാകുമെന്നും 18ലക്ഷം പേര്ക്ക് ജീവന് നഷ്ടപ്പെട്ടിട്ടുണ്ടാകുമെന്നും പഠനം പറയുന്നു. 84 രാജ്യങ്ങളിലെ കൊവിഡ് ഡാറ്റകള് അവലോകനം ചെയ്താണ് എം.ഐ.ടി റിപ്പോര്ട്ട് തയാറാക്കിയിരിക്കുന്നത്.
കോവിഡ് ഏറ്റവും മോശമായി ബാധിക്കുക ഇന്ത്യയെയായിരിക്കും. അമേരിക്ക, ദക്ഷിണാഫ്രിക്ക, ഇറാന്, ഇന്തൊനേഷ്യ, നൈജീരിയ, തുര്ക്കി, ഫ്രാന്സ്, ജര്മനി എന്നീ രാജ്യങ്ങളായിരിക്കും ഇന്ത്യക്ക് പിന്നിലുണ്ടാകുക. 130 കോടി ജനങ്ങളുള്ള ഇന്ത്യയുടെ രോഗവ്യാപന സാധ്യതകളെല്ലാം പരിശോധിച്ചാണ് എം.ഐ.ടിയുടെ പഠന റിപ്പോര്ട്ട് അവകാശപ്പെട്ടുന്നു.
അമേരിക്കയില് പ്രതിദിനം 95,000 കേസുകള് ഉണ്ടാകുമെന്നാണ് പഠനം. ദക്ഷിണാഫ്രിക്കയില് ഇത് 21,000വും ഇറാനില് 17,000വുമാണ്. ഇന്തോനേഷ്യയില് പ്രതിദിനം 13,000 കേസുകളുണ്ടാകുമെന്നും മുന്നറിയിപ്പുമുണ്ട്. എഐടി സ്ലോന് സ്കൂള് ഓഫ് മാനേജ്മെന്റിലെ ഹാസിര് റഹ്മാന്ദാദ്, ടി.വൈ. ലിം, ജോണ് സ്റ്റെര്മാന് എന്നിവരാണ് റിപ്പോര്ട്ട് തയാറാക്കിയത്.
