യൂറോപ്പ് : ഇന്ത്യ അടക്കം നിരവധി രാജ്യങ്ങളില് കൊവിഡിന്റെ പുതിയ ഉപ വകഭേദമായ ബി 2 പകരുന്നതായി ഗവേഷകര്.ഒമിക്രോണിന്റെ ആദ്യ രൂപത്തെക്കാള് പകര്ച്ച ശേഷി കൂടിയതാണ് ഈ പുതിയ വൈറസ് എന്നെന്നും ഗവേഷകര് പറയുന്നു. അതേസമയം, യൂറോപ്പില് ഇപ്പോഴുള്ള ഒമിക്രോണ് തരംഗത്തോടെ കൊവിഡിന്റെ രൂക്ഷത അവസാനിക്കുമെന്ന് ലോകാരോഗ്യ സംഘടനയുടെ യൂറോപ്യന് ഡയറക്ടര് അറിയിച്ചു. മാര്ച്ചോടെ യൂറോപ്പിലെ 60 ശതമാനം ആളുകളും രോഗികളാകും. എല്ലാവരും വാക്സീന് എടുത്തവരോ രോഗം വന്നു പോയവരോ ആകുന്നതോടെ വ്യാപനം ഇല്ലാതാകുമെന്ന് ഡബ്ല്യൂഎച്ച്ഒയുടെ യൂറോപ്യന് ഡയറക്റ്റര് ഹാന്സ് ക്ളോഗ് പറഞ്ഞു.
അതേസമയം, പ്രധാന നഗരങ്ങളില് കൊവിഡ് രോഗികളുടെ എണ്ണം കുത്തനെ കുറയുകയാണ്. ഡല്ഹിയില് ഒരിടവേളയ്ക്ക് ശേഷം പ്രതിദിന കൊവിഡ് കേസുകള് പതിനായിരത്തിന് താഴെയെത്തി. മുംബൈയിലും കൊല്ക്കത്തയിലും മൂവായിരത്തില് കുറവാണ് രോഗികള്. കര്ണാടകയിലാണ് ഇന്നലെ ഏറ്റവും കൂടുതല് പേര്ക്ക് കൊവിഡ് സ്ഥിരീകരിച്ചത്. രാജ്യത്തെ രോഗവ്യാപന തോത് കാണിക്കുന്ന ആര് നോട്ട് ജനുവരി ആദ്യ ആഴ്ച്ചയേക്കാള് കുറഞ്ഞതായി മദ്രാസ് ഐഐടി നടത്തിയ പഠനത്തില് കണ്ടെത്തി. മദ്രാസ് ഐഐടിയുടെ പഠന പ്രകാരം 2.2 ആയിരുന്ന ആര് നോട്ട് 1.57 ആയാണ് കുറഞ്ഞത്. ഈ നിരക്ക് ഒന്നിന് താഴെ എത്തിയാല് വ്യാപനം കുറഞ്ഞെന്ന് കണക്കാക്കും.