കൊച്ചി : പ്രതിസന്ധികാലത്ത് കൈതാങ്ങായവര്‍ ചെയ്ത ജോലിക്ക് കൂലി തേടിയലയുന്നു. എന്‍.എച്ച്.എമ്മിന് കീഴില്‍ താല്‍ക്കാലിക അടിസ്ഥാനത്തില്‍ ജോലി ചെയ്ത കോവിഡ് ബ്രിഗേഡുമാര്‍ക്കാണ് ഈ ദുര്‍ഗതി. രണ്ടുമാസത്തെ ശമ്പളവും, ഏഴുമാസത്തെ റിസ്‌ക് അലവന്‍സും കുടിശികയിരിക്കെയാണ് ഇരുപത്തിരണ്ടായിരത്തില്‍പരം താല്‍ക്കാലിക ജീവനക്കാരെ ആരോഗ്യ വകുപ്പ് പിരിച്ചുവിട്ടത്. ഇതോടെ നീതി തേടി സമരത്തിനൊരുങ്ങുകയാണ് പിരിച്ചുവിടപ്പെട്ടവര്‍.
ജോലി രാജിവച്ചാണ് വൈപ്പിനിലെ സ്വകാര്യ ആശുപത്രിയില്‍ നഴ്‌സായിരുന്ന ജീന കോവിഡ് ആശുപത്രിയില്‍ നഴ്‌സിങ് അസിസ്റ്റന്റായത്. ജോലിയില്‍ 100 ദിവസം പൂര്‍ത്തിയാക്കുന്നവര്‍ക്ക് ആരോഗ്യവകുപ്പിലും ദേശീയ ആരോഗ്യദൗത്യത്തിനും കീഴില്‍ ഒഴിവ് വരുന്ന തസ്തികകളിലേക്കുള്ള നിയമനത്തില്‍ മുന്‍ഗണന നല്‍കുമെന്ന് വാഗ്ദാനവും നല്‍കി. ഇവയെല്ലാം കണക്കിലെടുത്താണ് ജീനയെ പോലെയുള്ള ആരോഗ്യപ്രവര്‍ത്തകര്‍ മഹാമാരിക്കാലത്ത് കോവിഡ് മുന്‍നിര പോരാളികളായത്.
