ദില്ലി; ഇന്ത്യയില്‍ വീണ്ടും കോവിഡ് കേസുകള്‍ കുതിച്ചുയരുന്നു. കഴിഞ്ഞ 24 മണിക്കൂറിനുള്ളില്‍ 800-ലധികം കേസുകള്‍ റിപ്പോര്‍ട്ട് ചെയ്തതായി കേന്ദ്ര ആരോഗ്യ മന്ത്രാലയത്തിന്റെ കണക്കുകള്‍ വ്യക്തമാക്കുന്നു. 841 സജീവ കേസുകള്‍ റിപ്പോര്‍ട്ട് ചെയ്തതോടെ ഇന്ത്യയിലാകെ 5,389 കോവിഡ് രോഗികളാണുള്ളത്. നാല് മാസത്തിനിടയിലെ ഏറ്റവും ഉയര്‍ന്ന കണക്കാണിത്. കേരളം, മഹാരാഷ്ട്ര, കര്‍ണാടക, ഗുജറാത്ത് എന്നിവിടങ്ങളിലാണ് ഏറ്റവും കൂടുതല്‍ പേര്‍ ചികിത്സയില്‍ കഴിയുന്നത്.
കോവിഡ് സാഹചര്യം കണക്കിലെടുത്ത് കേരളം ഉള്‍പ്പെടെയുള്ള 6 സംസ്ഥാനങ്ങള്‍ക്ക് കേന്ദ്ര ആരോഗ്യമന്ത്രാലയം കത്ത് നല്‍കിയിരുന്നു. കേരളത്തിനുപുറമേ തമിഴ്നാട് കര്‍ണാടക മധ്യപ്രദേശ് ഗുജറാത്ത് തെലങ്കാന എന്നീ സംസ്ഥാനങ്ങള്‍ക്കാണ് കേന്ദ്രം നിര്‍ദ്ദേശം നല്‍കിയത്. പരിശോധന, ചികിത്സ, നിരീക്ഷണം, വാക്സിനേഷന്‍ എന്നിവ കര്‍ശനമാക്കണെന്നും കത്തില്‍ നിര്‍ദേശിച്ചിരുന്നു. ഇതിനെല്ലാം ഉപരിയായി, ഇന്‍ഫ്‌ലുവന്‍സ കേസുകള്‍ കുതിച്ചുയരുകയാണ്. കണക്കുകള്‍ പ്രകാരം ജനുവരി ആദ്യവാരം മുതല്‍ പ്രതിദിനം 583 കേസുകളും ഒമ്പത് മരണവും റിപ്പോര്‍ട്ട് ചെയ്തിട്ടുണ്ട്.
