തിരുവനന്തപുരം : കോവിഡില് നിന്ന് കുട്ടികളെ സംരക്ഷിക്കാന് സംസ്ഥാനത്ത് പുതിയ മാര്ഗരേഖ തയ്യാറാക്കി ആരോഗ്യ വകുപ്പ് . നവജാത ശിശുക്കളേയും കുട്ടികളേയും ബാധിച്ചാല് മുന്നൊരുക്കങ്ങള്ക്കായി ആരോഗ്യ വകുപ്പ് സര്ജ് പ്ലാനും അവരുടെ ചികിത്സയ്ക്കായി ചികിത്സാ മാര്ഗരേഖയും തയ്യാറാക്കിയതായി ആരോഗ്യ മന്ത്രി വീണാ ജോര്ജ്. കുട്ടികളില് ഉണ്ടാകുന്ന കോവിഡും കോവിഡാനന്തര പ്രശ്നങ്ങള്ക്കുമുള്ള ചികിത്സാ മാര്ഗരേഖയാണ് പുറത്തിറക്കിയത്.
കോവിഡിന്റെ ഒന്നും രണ്ടും തരംഗത്തില് കുട്ടികളെ വലുതായി കോവിഡ് ബാധിച്ചില്ല. 10 ശതമാനത്തിന് താഴെ മാത്രമാണ് രണ്ട് തരംഗത്തിലും കുട്ടികളെ ബാധിച്ചത്. മൂന്നാം തരംഗത്തിലും കുട്ടികളെ വലുതായി ബാധിക്കാന് സാധ്യത കുറവാണ്. എങ്കിലും ലോകത്തിന്റെ വിവിധ ഭാഗങ്ങളില് കുട്ടികളെ കൂടുതലായി കോവിഡ് ബാധിക്കാന് സാധ്യതയുണ്ടെന്ന ആശങ്ക നിലനില്ക്കുന്നുണ്ട്. കുട്ടികള്ക്ക് വാക്സിന് നല്കാന് കഴിയാത്തതും ഒരു കാരണമാണ്. സംസ്ഥാനത്തെ സംബന്ധിച്ച് സ്കൂള് തുറക്കുന്ന സാഹചര്യമുണ്ടായാലും കുട്ടികളില് രോഗം വര്ദ്ധിക്കാന് സാധ്യതയുണ്ട്. ഈയൊരു പശ്ചാത്തലത്തിലാണ് നവജാത ശിശുക്കളുടേയും കുട്ടികളുടേയും ചികിത്സയ്ക്കായി സര്ജ് പ്ലാനും ചികിത്സാ മാര്ഗരേഖയും തയ്യാറാക്കിയതെന്നും മന്ത്രി വ്യക്തമാക്കി.
നേരിയ (മൈല്ഡ്), മിതമായ (മോഡറേറ്റ്), ഗുരുതര (സിവിയര്) രോഗം എന്നിങ്ങനെ മൂന്ന് വിഭാഗങ്ങളായി തിരിച്ചാണ് കുട്ടികള്ക്കുള്ള ചികിത്സ സജ്ജമാക്കുന്നത്. കോവിഡ് ബാധിച്ചാല് ബഹുഭൂരിപക്ഷം കുട്ടികള്ക്കും നേരിയ രോഗം വരാനാണ് സാധ്യത. നേരിയ രോഗലക്ഷണമുള്ള കുട്ടികളെ വീട്ടില് തന്നെ ചികിത്സിക്കുന്നതാണ്.
