ന്യൂഡല്ഹി : ഇന്ത്യയില് കോവിഡ് 19 സമൂഹവ്യാപനത്തിലേയ്ക്ക് കടന്നിട്ടില്ലെന്ന ഇന്ത്യന് കൗണ്സില് ഓഫ് മെഡിക്കല് റിസര്ച്ചിന്റെ (ഐസിഎംആര്) നിലപാടിനെ വിമര്ശിച്ച് വിദഗ്ധര്. നിലവിലെ സാഹചര്യം കണക്കിലെടുക്കുമ്പോള് ഇന്ത്യയുടെ പല ഭാഗങ്ങളിലും സമൂഹവ്യാപനം നടന്നുകഴിഞ്ഞതായി കരുതാമെന്നും സര്ക്കാര് ഇക്കാര്യത്തില് പിടിവാശിയാണ് കാണിക്കുന്നതെന്നും സത്യം അംഗീകരിച്ചേ മതിയാകൂ എന്നും വിദഗ്ധര് പറയുന്നു.
രാജ്യത്തിന്റെ വിവിധ ഭാഗങ്ങളില് സമൂഹവ്യാപനം നടന്നുകഴിഞ്ഞു എന്ന കാര്യത്തില് സംശയമില്ലെന്ന് എയിംസ് മുന് ഡയറക്ടര് ഡോ. എം.സി മിശ്ര പറഞ്ഞു. കുടിയേറ്റ തൊഴിലാളികളുടെ കൂട്ട പലായനവും ലോക്ക്ഡൗണ് ഇളവുകളും വന്നതോടെ രോഗവ്യാപനം വളരെ വേഗത്തിലായി. ഇതുവരെ രോഗം റിപ്പോര്ട്ട് ചെയ്യപ്പെടാതിരുന്ന ഇടങ്ങളിലും രോഗാണുക്കള് എത്തിച്ചേര്ന്നു. സമൂഹവ്യാപനം സംഭവിച്ചെന്ന വസ്തുത ഇനിയെങ്കിലും സര്ക്കാര് അംഗീകരിച്ചേ മതിയാകൂ. ജനങ്ങള് കൂടുതല് ശ്രദ്ധയോടെ ഇരിക്കുന്നതിന് അത് ആവശ്യമാണെന്നും ഡോ. മിശ്ര പറഞ്ഞു.
ഇന്ത്യയില് സാമൂഹ്യവ്യാപനം ഇല്ലെന്ന ഐസിഎംആര് മേധാവി ബല്റാം ഭാര്ഗവയുടെ പ്രസ്താവനയെയും ഡോ. മിശ്ര തള്ളിക്കളഞ്ഞു. സാമൂഹ്യവ്യാപനമില്ലെന്ന നിഗമനത്തിലെത്തിച്ചേരുന്നതിന് ഐസിഎംആര് നടത്തിയ സീറോ സര്വേയില് 26,400 സാമ്പിളുകള് മാത്രമാണ് പരിശോധിച്ചത്. ഇന്ത്യയുടെ വൈവിധ്യവും വലിയ ജനസംഖ്യയും കണക്കിലെടുക്കുമ്പോള് രോഗവ്യാപനത്തിന്റെ തോത് കണ്ടെത്താന് ഇത് അപര്യാപ്തമാണെന്നും മിശ്ര ചൂണ്ടിക്കാട്ടി.
ഇന്ത്യ നേരത്തെ തന്നെ സമൂഹവ്യാപനത്തിന്റെ ഘട്ടത്തില് എത്തിച്ചേര്ന്നിരുന്നതായി പ്രമുഖ വൈറോളജിസ്റ്റ് ഷാഹിദ് ജമീല് പറഞ്ഞു. എന്നാല് ആരോഗ്യരംഗത്തെ അധികാരികള് അത് അംഗീകരിക്കുന്നില്ല എന്നേയുള്ളൂ. ഐസിഎംആര് തന്നെ നടത്തിയ പഠനത്തില് വ്യക്തമാകുന്നത് ഇന്ത്യയില് രോഗം സ്ഥിരീകരിക്കപ്പെട്ട 40% പേരുടെയും രോഗബാധയുടെ ഉറവിടം വ്യക്തമല്ല എന്നാണ്. ഇവര് വിദേശരാജ്യങ്ങള് സന്ദര്ശിക്കുകയോ ഏതെങ്കിലും കോവിഡ് രോഗിയുമായി അടുത്തിടപഴകുകയോ ചെയ്തിട്ടില്ല. ഇത് സാമൂഹ്യവ്യാപനമല്ലെങ്കില് പിന്നെന്താണ്?, അദ്ദേഹം ചോദിക്കുന്നു.
ഇന്ത്യയില് പൊതുവെ സമൂഹവ്യാപനമില്ലെന്ന ഐസിഎംആറിന്റെ വാദം അംഗീകരിച്ചാല്ത്തന്നെ ഡല്ഹി, അഹമ്മദാബാദ്, മുംബൈ തുടങ്ങിയ നഗരങ്ങളില് സമൂഹവ്യാപനം നടന്നുകഴിഞ്ഞു എന്ന വസ്തുത നിരാകരിക്കാനാവില്ലെന്ന് പ്രമുഖ ശ്വാസകോശ രോഗ വിദഗ്ധന് ഡോ. അരവിന്ദ് കുമാര് ചൂണ്ടിക്കാട്ടുന്നു. ഇത്രയും വിശാലമായ രാജ്യത്തെ വ്യത്യസ്ത സംസ്ഥാനങ്ങളില് വ്യത്യസ്തമായ രീതിയിലാണ് വൈറസ് വ്യാപനം സംഭവിക്കുന്നത്. ഐസിഎംആറിന്റെ പഠനം ഏപ്രില് മാസത്തെ രോഗവ്യാപനത്തെ മുന്നിര്ത്തിയാണെങ്കില് സമൂഹവ്യാപനം നടന്നിട്ടില്ലെന്ന വാദം അടിസ്ഥാനരഹിതമാണെന്നും അദ്ദേഹം പറയുന്നു.
