തിരുവനന്തപുരം: തിരുവനന്തപുരം ആര്യനാട് കെ.എസ്.ആര്.ടി.സി യൂണിറ്റിലെ ഒരു ജീവനക്കാരന് കോവിഡ് സ്ഥിരീകരിച്ചു. ആര്യനാട് ഡിപ്പോയിലെ സ്റ്റേഷന് മാസ്റ്ററായ കുറ്റിച്ചല് സ്വദേശിക്കാണ് കോവിഡ് സ്ഥിരീകരിച്ചത്. ഇയാളുടെ ഒരു ബന്ധു വിദേശത്ത് നിന്ന് വന്നിരുന്നു. അവരുടെ അടുത്തേക്ക് പോയില്ലെങ്കിലും അവര് കൊണ്ടുവന്ന പെട്ടികള് ഇയാള് ചുമന്നുവെന്നാണ് വിവരം.
ഇദ്ദേഹവുമായി സമ്പര്ക്കത്തിലേര്പ്പെട്ട മുഴുവന് ജീവനക്കാരോടും ആരോഗ്യവകുപ്പുമായി ബന്ധപ്പെടാനും തുടര്നടപടികള് സ്വീകരിക്കാനും നിര്ദ്ദേശം നല്കിയിട്ടുണ്ട്. ആര്യനാട് കെ.എസ്.ആര്.ടി.സി ഡിപ്പോയില് നിന്നും ഇനി ഒരു അറിയിപ്പ് ഉണ്ടാകുന്നതുവരെ സര്വ്വീസുകള് ഉണ്ടായിരിക്കുന്നതല്ല. ഇന്ന് സര്വ്വീസ് നടത്തിയ മുഴുവന് ബസുകളും ഡിപ്പോയിലേക്ക് തിരിച്ചു വിളിച്ചിട്ടുണ്ട്.
ഡിപ്പോയും ബസുകളും അണുനശീകരണം നടത്തുവാനുള്ള സജ്ജീകരണം ഏര്പ്പെടുത്തി കഴിഞ്ഞു. ആര്യനാട് ഡിപ്പോയില് നിന്നും നടത്തിവന്നിരുന്ന പ്രധാന സര്വ്വീസുകള് താത്ക്കാലികമായി തൊട്ടടുത്ത നെടുമങ്ങാട്, കാട്ടാക്കട എന്നീ ഡിപ്പോകളില് നിന്നും നടത്തുന്നതാണ്. വെള്ളനാട് ഡിപ്പോ തീവ്രബാധിത മേഖല ആയതിനാല് അവിടെനിന്നും സര്വ്വീസുകള് നടത്താന് സാധിക്കില്ലെന്ന് കെ.എസ്.ആര്.ടി.സി അധികൃതര് അറിയിച്ചു.
