ലഖ്നൗ: കോവിഡ് ബാധിച്ച് മരിച്ചയാളുടെ മൃതദേഹം പാലത്തില്നിന്ന് നദിയില് എറിഞ്ഞു. ഉത്തര്പ്രദേശിലെ ബല്റാംപുരിലാണ് സംഭവം. പി.പി.ഇ. കിറ്റ് ധരിച്ചെത്തിയ ഒരാളടക്കം രണ്ടുപേര് ചേര്ന്നാണ് മൃതദേഹം പാലത്തില്നിന്ന് രപ്തി നദിയിലേക്ക് എറിഞ്ഞത്. സംഭവത്തിന്റെ വീഡിയോ വ്യാപകമായി പ്രചരിച്ചതോടെ കേസെടുത്ത് അന്വേഷണം ആരംഭിച്ചതായി പോലീസ് അറിയിച്ചു.
സിദ്ധാര്ഥനഗര് സ്വദേശി പ്രേംനാഥിന്റെ മൃതദേഹമാണ് നദിയില് ഉപേക്ഷിച്ചതെന്ന് പോലീസ് കണ്ടെത്തിയിട്ടുണ്ട്. രണ്ടുപേര് ചേര്ന്നാണ് മൃതദേഹം പാലത്തില്നിന്ന് നദിയിലേക്ക് തള്ളിയത്. ഇതിന്റെ ദൃശ്യങ്ങള് ആ വഴി കാറിലെത്തിയ മറ്റൊരാള് മൊബൈല് ഫോണില് പകര്ത്തിയിരുന്നു. ഈ വീഡിയോ പിന്നീട് സമൂഹമാധ്യമങ്ങളില് വ്യാപകമായി പ്രചരിക്കുകയും ചെയ്തു.
അതേസമയം കോവിഡ് പ്രോട്ടോക്കോള് അനുസരിച്ചാണ് പ്രേംനാഥിന്റെ മൃതദേഹം ബന്ധുക്കള്ക്ക് വിട്ടുനല്കിയതെന്ന് ബല്റാംപുര് ചീഫ് മെഡിക്കല് ഓഫീസര് മാധ്യമങ്ങളോട് പറഞ്ഞു. മെയ് 25-നാണ് കോവിഡ് ബാധിച്ച് പ്രേംനാഥിനെ ആശുപത്രിയില് പ്രവേശിപ്പിച്ചത്. മെയ് 28-ന് മരിച്ചു. തുടര്ന്ന് സംസ്ക്കരിക്കാനായി മൃതദേഹം ബന്ധുക്കള്ക്ക് വിട്ടുനല്കിയെന്നും ഇവര് മൃതദേഹം നദിയില് ഉപേക്ഷിക്കുകയായിരുന്നുവെന്നും ചീഫ് മെഡിക്കല് ഓഫീസര് വിശദീകരിച്ചു.
