തലശ്ശേരി : കോവിഡ് നിരീക്ഷണത്തിലിരുന്ന യുവാവ് ആശുപത്രിയില് നിന്ന് ചാടിപ്പോയി. ആറളം കോളി പനച്ചിക്കല് ദേവന്റെ മകന് ദിലീപ് .ടി. ദേവനാണ് ആശുപത്രിയില് നിന്ന് കടന്നു കളഞ്ഞത്.
മോഷണ കേസില് ആറളം സ്റ്റേഷനില് നിന്നും റിമാന്ഡ് ചെയ്ത തടവുകാരനായിരുന്നു ഇയാള്. കോവിഡ് സ്ഥിരീകരിച്ചതിനെ തുടര്ന്ന് വ്യാഴാഴ്ച വെകുന്നേരമാണ് അഞ്ചരക്കണ്ടിയിലെ കേന്ദ്രത്തില് എത്തിച്ചത്. ഒരു കിലോമീറ്റര് ഇപ്പുറം വന്ന് മട്ടന്നൂര് ഭാഗത്തേക്കുള്ള ബസില് പോയതായി നാട്ടുകാര് കണ്ടിരുന്നു. ഇയാള്ക്ക് വേണ്ടി തിരച്ചില് ഊര്ജിതമാക്കിയിട്ടുണ്ട്.
അതേസമയം, കനത്ത സുരക്ഷയിലുള്ള ഇവിടെ നിന്നും ഒരു പോസിറ്റീവ് രോഗി ചാടിപ്പോയത് ജനങ്ങളെ ആശങ്കയിലാക്കിയിട്ടുണ്ട്. പോലീസും സെക്യൂരിറ്റിയും ഇവിടെ ഉണ്ടായിരിക്കെ ഇത്തരത്തില് സംഭവിച്ചത് പ്രാദേശവാസികളെ ഭയത്തിലാക്കുന്നു.
ഇന്ന് രാവിലെ പത്തു മണിയോടു കൂടിയാണ് ഇയാള് ആശുപത്രിയില് നിന്ന് കടന്നുകളഞ്ഞത്. രക്ഷപ്പെടുന്ന സമയത്ത് ഇയാള് ധരിച്ചിരുന്നത് കറുത്ത നിറത്തിലുളള ടീഷര്ട്ടാണ്.
