തിരുവനന്തപുരം : എയര്പോര്ട്ടില് നിന്നും തിരുവനന്തപുരം മെഡിക്കല് കോളേജില് എത്തിച്ച രോഗിയെ പരിശോധനാഫലം ലഭിക്കും മുമ്പ് ഡിസ്ചാര്ജ് ചെയ്ത സംഭവത്തില് മന്ത്രി കെ. കെ ശൈലജ ആശുപത്രി സൂപ്രണ്ടിനോട് റിപ്പോര്ട്ട് തേടി. അന്വേഷണത്തില് കുറ്റക്കാരെന്ന് കണ്ടെത്തുന്നവര്ക്കെതിരെ ശക്തമായ നടപടി സ്വീകരിക്കും. രോഗലക്ഷണമില്ലാത്തവരെ ആശുപത്രിയില് അഡ്മിറ്റ് ചെയ്യപ്പെടാതെ ക്വാറന്റൈന് കേന്ദ്രത്തിലേക്ക് അയക്കാമെന്ന് കേന്ദ്ര മാര്ഗനിര്ദേശങ്ങള് ഉണ്ടെങ്കിലും പോസിറ്റീവ് കേസുകളില് അങ്ങനെ തീരുമാനിക്കാറില്ല. സ്രവ പരിശോധനയ്ക്ക് സാമ്പിളെടുത്താല് റിസള്ട്ട് വരും വരെ കാത്തു നില്ക്കേണ്ടതുണ്ട്. അതിനിടയില് രോഗിയെ ആംബുലന്സില് വീട്ടിലെത്തിക്കുകയാണ് ചെയ്തത്. എന്തുകൊണ്ടാണ് നടപടിക്രമം കൃത്യമായി പാലിക്കാതിരുന്നതെന്ന് അന്വേഷിക്കുന്നതാണ്.
സ്വകാര്യ വാഹനത്തിലാണ് രോഗിയെ വീട്ടിലെത്തിച്ചതെന്ന് ചില മാധ്യമങ്ങള് റിപ്പോര്ട്ട് ചെയ്തിരുന്നു. ആശുപത്രി സൂപ്രണ്ടിനോട് അന്വേഷിച്ചപ്പോള് ആംബുലന്സിലാണ് വീട്ടിലെത്തിച്ചതെന്നും തിരികെ കൊണ്ടു വന്നതെന്നും പറയുന്നുണ്ട്. എങ്കിലും ആരോഗ്യ വകുപ്പ് വളരെ സൂക്ഷ്മതയോടും ത്യാഗപൂര്ണമായും പ്രവര്ത്തനം നടത്തുന്നതിനിടയില് ഇത്തരത്തില് യാതൊരു ശ്രദ്ധക്കുറവും ഉണ്ടാകാന് പാടില്ല. അതിനാലാണ് ഇതിനെക്കുറിച്ച് അന്വേഷണം നടത്തുന്നതെന്നും മന്ത്രി വ്യക്തമാക്കി.
