തിരുവനന്തപുരം : കൊവിഡ് വ്യാപനത്തിന്റെ രണ്ടാം തരംഗത്തില് രണ്ട് ഡോസ് വാക്സീനേഷന് സ്വീകരിച്ചവരിലും വൈറസ് പടരുന്നുണ്ടെന്ന് ആരോഗ്യവകുപ്പ് കണ്ടെത്തി. ഇത് കണക്കിലെടുത്ത് കൂടുതല് വേഗത്തില് പടരുന്ന വൈറസ് കേരളത്തില് വ്യാപിച്ചിട്ടുണ്ടോയെന്ന് കണ്ടെത്താന് ആരോഗ്യവകുപ്പിനോട് ചീഫ് സെക്രട്ടറിയുടെ അധ്യക്ഷതയില് ഇന്നലെ ചേര്ന്ന യോഗം നിര്ദ്ദേശിച്ചിട്ടുണ്ട്. കൂടാതെ ഈ മാസം 21, 22 തീയതികളില് മൂന്ന് ലക്ഷം പേര്ക്ക് കൊവിഡ് ടെസ്റ്റ് ചെയ്യാന് ലക്ഷ്യമിട്ട് രണ്ടാമത്തെ മാസ് ടെസ്റ്റിംഗ് ക്യാമ്പയിന് നടത്താന് ആരോഗ്യവകുപ്പിനോട് നിര്ദേശിച്ചു.
കൊവിഡ് രോഗികളുടെ ഡിസ്ചാര്ജുമായി ബന്ധപ്പെട്ട നിലവിലെ നയം ചര്ച്ച ചെയ്ത് മാറ്റം വരുത്തേണ്ടതുണ്ടോ എന്നത് പരിശോധിക്കാന് ആരോഗ്യവകുപ്പ് പ്രിന്സിപ്പല് സെക്രട്ടറിയെ യോഗം ചുമതലപ്പെടുത്തി. രോഗവ്യാപനം രൂക്ഷമാകുന്ന സാഹചര്യത്തില് സംസ്ഥാനത്തിന് ആവശ്യമായ ഓക്സിജന്, ടെസ്റ്റിംഗ് സാമഗ്രികള്, അവശ്യ മരുന്നുകള്, കിടക്കകള് മുതലായവയുടെ ലഭ്യത ആരോഗ്യ വകുപ്പ് ഉറപ്പാക്കണം.
നിയമസഭാ തിരഞ്ഞെടുപ്പിന്റെ വോട്ടെണ്ണല് ദിനമായ മെയ് രണ്ടിന് കേരളത്തിലുടനീളം ലോക്ക്ഡൗണ് ഏര്പ്പെടുത്താന് ആവശ്യപ്പെട്ടുകൊണ്ട് കേരള ഹൈക്കോടതിയില് ലഭിച്ച കേസ് യോഗത്തില് ചര്ച്ച ചെയ്തു. അന്നേ ദിവസം ആഘോഷങ്ങളോ ആളുകളുടെ തിരക്കുകളോ അനുവദിക്കരുതെന്ന് യോഗം തീരുമാനിച്ചു.
