തിരുവനന്തപുരം: സംസ്ഥാനത്ത് കോവിഡ് രൂക്ഷമാകുന്ന സാഹചര്യത്തില് നാളെ മുതല് ഞായറാഴ്ച വരെ ലോക്ക്ഡൗണ് സമാനമായ നിയന്ത്രണങ്ങള് . ചൊവ്വാഴ്ച മുതല് അനാവശ്യമായി ആരെയും വീടിനു പുറത്തിറങ്ങാന് അനുവദിക്കില്ല. നിരത്തിലറങ്ങുന്ന എല്ലാ വാഹനങ്ങളും പോലീസ് പരിശോധിക്കും. അധികൃതര് നിര്ദേശിക്കുന്ന നിയന്ത്രണങ്ങള് ലംഘിക്കുന്നവര്ക്കെതിരെ ദുരന്തനിവാരണ നിയമപ്രകാരം കേസെടുക്കാനാണ് പോലീസിനു നല്കിയിരിക്കുന്ന നിര്ദേശം.
വിവാഹ, സംസ്കാര ചടങ്ങുകളില് പങ്കെടുക്കുന്നതിനു കര്ശന നിയന്ത്രണങ്ങള്. തുണിക്കടകള്, ജ്വല്ലറികള്, ബാര്ബര് ഷോപ്പുകള് തുടങ്ങിയവ തുറക്കില്ല. ഓട്ടോ, ടാക്സി, ചരക്ക് വാഹനങ്ങള് അത്യാവശ്യത്തിനു മാത്രം. ഇവയും പോലീസ് പരിശോധിക്കും. സ്വകാര്യ സ്ഥാപനങ്ങളില് ജോലിക്കു പോകുന്നവര് തിരിച്ചറിയല് കാര്ഡ് കാണിക്കണം. അത്യാവശ്യമല്ലാത്ത യാത്രകള് അനുവദിക്കില്ല. അടഞ്ഞ സ്ഥലങ്ങളില് കൂട്ടം കൂടാന് അനുവദിക്കില്ല. പാല്, പച്ചക്കറി, പലവ്യഞ്ജനം, മീന്, മാസം എന്നിവ വില്ക്കുന്ന കടകള് തുറക്കാം. പരമാവധി ഡോര് ഡെലിവറി വേണം.
24 മണിക്കൂറും പ്രവര്ത്തിക്കുന്ന കമ്പിനികള്ക്കും വ്യവസായ സ്ഥാപനങ്ങള്ക്കും തുറക്കാം. ജീവനക്കാര് തിരിച്ചറിയല് കാര്ഡ് കാണിക്കണം. പച്ചക്കറി, മീന് മാര്ക്കറ്റുകളില് കച്ചവടക്കാര് 2 മീറ്റര് അകലം പാലിക്കണം, വീടുകളിലെത്തിച്ചുള്ള മീന് വില്പ്പനയാകാം. 2 മാസ്കുകളും കഴിയുമെങ്കില് കയ്യുറയും ധരിക്കണം. ആശുപത്രികള്, മാധ്യമ സ്ഥാപനങ്ങള്, ടെലികോം, ഐടി, പാല്, പത്രവിതരണം, ജലവിതരണം, വൈദ്യുതി എന്നിവയുമായി ബന്ധപ്പെട്ട സ്ഥാപനങ്ങള്ക്കു മാത്രം പ്രവര്ത്തിക്കാം. കോവിഡ് വാക്സിനേഷന് കേന്ദ്രങ്ങള്ക്കു തടസ്സമില്ല. ഹോട്ടലുകള്ക്കും റസ്റ്ററന്റുകള്ക്കും ഹോം ഡെലിവറി മാത്രം.
