കുളത്തൂപ്പുഴ : വനവിഭവങ്ങള് ശേഖരിക്കാന് വനത്തില് പോയ മധ്യവയസ്കന് കരടിയുടെ ആക്രമണത്തില് പരിക്കേറ്റു. കുളത്തൂപ്പുഴ ആറ്റിനുകിഴക്കേക്കര ചെമ്പനഴികത്ത് താമസം മോഹനനെ (45) ആണ് മുഖത്തും തലയിലും ഗുരുതര പരിക്കുകളോടെ തിരുവനന്തപുരം മെഡിക്കല് കോളജ് ആശുപത്രിയില് പ്രവേശിപ്പിച്ചത്. കഴിഞ്ഞദിവസം വൈകുന്നേരം പരിക്കുകളോടെ കുളത്തൂപ്പുഴ സാമൂഹികാരോഗ്യകേന്ദ്രത്തില് ചികിത്സ തേടിയെത്തിയ മോഹനനെ തലയിലേറ്റ പരിക്ക് ഗുരുതരമായതിനാല് പ്രഥമ ശുശ്രൂഷ നല്കി മെഡിക്കല് കോളജിലേക്ക് അയക്കുകയായിരുന്നു.
കുളത്തൂപ്പുഴ വനം റേഞ്ചില് പെട്ട വനമേഖലയില് നിന്ന് വനവിഭവങ്ങള് ശേഖരിച്ച് മടങ്ങുന്നതിനിടെ പൊടുന്നനെ മുന്നില്പ്പെട്ട കരടി നിവര്ന്ന് നിന്ന് മോഹനന്റെ മുഖത്ത് കടിക്കുകയായിരുന്നുവെന്നും ഒപ്പമുണ്ടായിരുന്നവര് ബഹളം വെച്ചതോടെ ഓടി മറയുകയായിരുന്നുവെന്നുമാണ് ആശുപത്രി അധികൃതരോട് മോഹനന് പറഞ്ഞത്.
