തിരുവനന്തപുരം : ശ്രീചിത്ര മെഡിക്കല് കോളേജില് കോവിഡ് ബാധിതരായ ജീവനക്കാര്ക്ക് കോവിഡ് സ്പെഷല് ലീവ് നല്കുന്നില്ലെന്ന് പരാതി. കോവിഡ് ലീവ് നല്കണമെങ്കില് ആശുപത്രിയില് നിന്നാണ് രോഗം ബാധിച്ചതെന്ന് തെളിയിക്കണമെന്ന നിലപാടിലാണ് ആശുപത്രി അധികൃതര്. അതല്ലെങ്കില് മെഡിക്കല് ലീവ് എടുക്കാനാണ് അധികൃതര് നല്കുന്ന നിര്ദ്ദേശം. എയിംസ് അടക്കമുള്ള ആശുപത്രികള് ജീവനക്കാര്ക്ക് കോവിഡ് ലീവ് നല്കുമ്പോഴാണ് ശ്രീചിത്രയില് ഈ നിഷേധ നിലപാട്. നഴ്സുമാരോടാണ് വേര്തിരിവ് കൂടുതല് കാണിക്കുന്നതെന്ന ആരോപണവും ഉയര്ന്നിട്ടുണ്ട്. ആയിരക്കണക്കിന് കോവിഡ് രോഗികള് ചികിത്സക്കെത്തുന്നിടത്ത് ജോലിചെയ്യുന്ന ജീവനക്കാര് ആശുപത്രിയില് നിന്നാണ് രോഗം വന്നതെന്ന് തെളിയിക്കാന് എന്താണ് ചെയ്യുകയെന്നാണ് ജീവനക്കാരുടെ ചോദ്യം.
