ദില്ലി: രാജ്യത്ത് കൊവിഡ് വീണ്ടും പടര്ന്ന് പിടിക്കുന്ന പശ്ചാത്തലത്തില് രാജ്യത്തുടനീളമുള്ള ആശുപത്രികളില് രാജ്യവ്യാപകമായി മോക്ക് ഡ്രില്ലുകള് നടത്തും. ഏപ്രില് 10, 11 തീയതികളിലാണ് ആശുപത്രികളില് മോക് ഡ്രില് നടത്തുന്നത്. തയ്യാറെടുപ്പുകള് വിലയിരുത്തുന്നതിനാണ് മോക് ഡ്രില്. ഏപ്രില് 10, 11 തീയതികളില് രാജ്യത്തെ എല്ലാ ആശുപത്രികളിലും മോക്ക് ഡ്രില്ലുകള് നടക്കുമെന്നും എല്ലാ പൊതു, സ്വകാര്യ ആരോഗ്യ സൗകര്യങ്ങളുടെയും പങ്കാളിത്തം ഇതില് ഉണ്ടാകണമെന്നും ആരോഗ്യ കുടുംബക്ഷേമ മന്ത്രാലയത്തിന്റെ അറിയിപ്പില് പറയുന്നു.
അതേസമയം രാജ്യത്ത് 1590 പേര്ക്ക് പുതുതായി കൊവിഡ് സ്ഥിരീകരിച്ചു. കഴിഞ്ഞ 146 ദിവസത്തിനിടയില് രേഖപ്പെടുത്തുന്ന ഏറ്റവും ഉയര്ന്ന കണക്കാണ് ഇത്. കഴിഞ്ഞ ഏതാനും ദിവസങ്ങളായി ആയിരത്തിന് മുകളിലേക്ക് കൊവിഡ് കണക്കുകള് ഉയരുന്നുണ്ട്. നിലവില് ഇപ്പോള് ചികിത്സയില് കഴിയുന്നവരുടെ എണ്ണം 8601 ആയി ഉയര്ന്നിട്ടുണ്ട്.
