തിരുവനന്തപുരം : സിപിഐ സംസ്ഥാന നിര്വാഹക സമിതിയോഗം ഇന്ന്. വിവാദമായ ലോകായുക്ത നിയമഭേദഗതിയില് സിപിഐ നേതൃത്വം എതിര്പ്പ് അറിയിച്ച സാഹചര്യത്തില് തുടര്നടപടികള് സംബന്ധിച്ച് ഇന്ന് തീരുമാനമുണ്ടായേക്കും. സിപിഐ മന്ത്രിമാര്ക്കെതിരെ ഇന്നത്തെ യോഗത്തില് വിമര്ശനം ഉയര്ന്നേക്കും. മന്ത്രിസഭാ യോഗത്തില് പങ്കെടുത്ത നാല് സിപിഐ മന്ത്രിമാര് പാര്ട്ടിയെ വിവരങ്ങള് ധരിപ്പിക്കാത്തതിലും ഓര്ഡിനന്സിനെ പിന്തുണച്ചതും സിപിഐ നേതൃത്വത്തിന്റെ നിലപാടിനെ ദുര്ബലപ്പെടുത്തിയിരുന്നു. പ്രശ്നത്തില് സമവായമുണ്ടായെന്ന തെറ്റിദ്ധാരണയാണ് കാരണമെന്ന് മന്ത്രിമാര് പാര്ട്ടിയെ അറിയിച്ചെങ്കിലും നേതൃത്വം കടുത്ത അതൃപ്തിയിലാണ്. കെ റെയില് ഡിപിആര് വിവാദം, രവീന്ദ്രന് പട്ടയം അടക്കമുള്ള വിഷയങ്ങളും ഇന്നത്തെ യോഗത്തില് ചര്ച്ചയായേക്കും.
