തിരുവനന്തപുരം : ലോകായുക്തയുടെ അധികാരം വെട്ടിക്കുറച്ചത് ഉള്പ്പെടെ കാലാവധി അവസാനിക്കുന്ന 9 ഓര്ഡിനന്സുകള് വീണ്ടും ഇറക്കുന്നതിനു ഗവര്ണറോട് ശുപാര്ശ ചെയ്യാന് മന്ത്രിസഭ തീരുമാനിച്ചു. ലോകായുക്ത ഓര്ഡിനന്സ് വീണ്ടും ഇറക്കുന്നതിനെ മന്ത്രിസഭാ യോഗത്തില് സിപിഐ മന്ത്രിമാര് എതിര്ത്തെങ്കിലും പിന്നീടു വഴങ്ങി. തുറന്ന ചര്ച്ചയാകാമെന്ന് മന്ത്രിമാരും മുഖ്യമന്ത്രിയും വ്യക്തമാക്കിയതോടെയാണിത്. ഓര്ഡിനന്സിനു പകരമുള്ള ബില് നിയമസഭയില് അവതരിപ്പിക്കുന്നതിനു മുന്പ് ചര്ച്ചയാകാമെന്നാണു വാഗ്ദാനം. ലോകായുക്ത നിയമത്തില് വെള്ളം ചേര്ക്കുന്നതു ശരിയല്ലെന്നാണു സിപിഐ നിലപാടെന്നു കെ.രാജന്റെ നേതൃത്വത്തില് സിപിഐ മന്ത്രിമാര് വ്യക്തമാക്കി. എല്ഡിഎഫ് സര്ക്കാര് പാസാക്കിയ ലോകായുക്ത നിയമം അഴിമതിവിരുദ്ധ പ്രതിച്ഛായ ഉയര്ത്തിപ്പിടിക്കുന്നത് ആയിരുന്നു എന്നും മന്ത്രിമാര് ചൂണ്ടിക്കാട്ടി.
