ചേര്ത്തല : സിപിഐ എം 23-ാം പാര്ട്ടി കോണ്ഗ്രസില് ഉയര്ത്താനുള്ള പതാകയുമേന്തിയുള്ള ജാഥ അനശ്വര രക്തസാക്ഷികള് അന്ത്യവിശ്രമം കൊള്ളുന്ന വയലാറില് നിന്ന് പ്രയാണം ആരംഭിച്ചു. രാവിലെ ഒമ്പതിന് വയലാര് രക്തസാക്ഷി മണ്ഡപത്തില് ചേര്ന്ന സമ്മേളനത്തില് പൊളിറ്റ്ബ്യൂറോ അംഗം എം.എ ബേബി ജാഥാ ക്യാപ്റ്റന് സംസ്ഥാന സെക്രട്ടറിയറ്റ് അംഗം എം.സ്വരാജിന് പതാക കൈമാറി. മന്ത്രി സജി ചെറിയാന് അധ്യക്ഷനായി. സംസ്ഥാനകമ്മിറ്റി അംഗം സി.ബി ചന്ദ്രബാബുവാണ് ജാഥാ മാനേജര്. നൂറിലധികം അത്ലീറ്റുകളുടെയും വാഹനങ്ങളുടെയും അകമ്പടിയോടെയാണ് ജാഥ പ്രയാണം ആരംഭിച്ചത്. ഏപ്രില് 6 മുതല് 10 വരെ കണ്ണൂരിലാണ് പാര്ട്ടി കോണ്ഗ്രസ് ചേരുന്നത്.
പാര്ട്ടി കോണ്ഗ്രസിന്റെ ഭാഗമായി ഏപ്രില് ഒന്നിന് റെഡ് ഫ്ലാഗ് ഡേ ആചരിക്കും. ദേശീയ പാതയില് പാര്ട്ടി പതാകയുമായി ജനങ്ങള് അണിനിരക്കും. തലശ്ശേരി ജവഹര്ഘട്ട് മുതല് കണ്ണൂര് കാല്ടെക്സിലെ എകെജി പ്രതിമ വരെ 23 കീലോമീറ്റര് നീളത്തില് ദേശീയപാതയില് തുടര്ച്ചയായി ചെങ്കൊടി ഉയര്ത്തിപ്പിടിക്കും. വൈകുന്നേരം 5 മണിക്ക് ജവഹര് ഘട്ടില് സംസ്ഥാന സെക്രട്ടറി കോടിയേരി ബാലകൃഷ്ണന് ഫ്ലാഗ് ഡേ പ്രഖ്യാപനം നടത്തും. എകെജി സ്ക്വയറില് കേന്ദ്രകമ്മിറ്റിയംഗങ്ങളായ ഇ.പി ജയരാജന്, എം.വി ഗോവിന്ദന് തുടങ്ങിയവര് പങ്കെടുക്കും.
