ന്യൂഡല്ഹി : ഏക സിവില് കോഡിനായുള്ള സ്വകാര്യ ബില്ലിന് അവതരണാനുമതി നല്കരുത് എന്നാവശ്യപ്പെട്ട് സിപിഐഎം എംപിമാരായ എളമരം കരീം, ജോണ് ബ്രിട്ടാസ്, വി.ശിവദാസന്, സോമപ്രസാദ്, എന്നിവര് രാജ്യസഭയില് നോട്ടീസ് നല്കി. ബിജെപി അംഗം ഡോക്ടര് കിറോഡി ലാല് മീണയുടെ സ്വകാര്യ ബില്ലിനെതിരെയാണ് നോട്ടീസ് നല്കിയത്. അതേസമയം, ഗവര്ണര്മാരുടെ നിയമനങ്ങളിലും നീക്കം ചെയ്യലിലും ഭരണഘടനാ ഭേദഗതി ആവശ്യപ്പെട്ട് പാര്ലിമെന്റില് വി ശിവദാസന് എംപി സ്വകാര്യ ബില് അവതരിപ്പിക്കും.
ഗവര്ണമാരുടെ നിയമനം ജനപ്രതിനിധികളുടെ വോട്ട് അനുസരിച്ച് തീരുമാനിക്കണമെന്നാണ് ബില്ലില് ആവശ്യപ്പെടുന്നത്. നിയമസഭ വഴി ഗവര്ണര്മാരെ നീക്കം ചെയ്യുന്നതിനുള്ള അവസരം വേണം. സംസ്ഥാന താത്പര്യത്തിന് അനുസരിച്ച് പ്രവര്ത്തിക്കേണ്ട ഗവര്ണര്മാര് അതില് വീഴ്ച വരുത്തുമ്പോള് പിന്വലിക്കാന് നിയമസഭക്ക് അധികാരം നല്കണം. മൂന്നില് രണ്ട് ഭൂരിപക്ഷത്തോടെ നിയമസഭ പ്രമേയം പാസ്സാക്കിയാല് ഗവര്ണറെ പിന്വലിക്കണമെന്നും ബില്ലില് നിര്ദേശമുണ്ട്.
