ഡൽഹി: പശ്ചിമ ബംഗാൾ സന്ദർശനത്തിനിടെ രാഷ്ട്രപതി ദ്രൗപദി മുർമുവിനെ സ്വീകരിക്കുന്നതിൽ വീഴ്ച വരുത്തിയ മമത ബാനർജി സർക്കാരിനെതിരെ വിമർശനവുമായി സിപിഐ എം മുതിർന്ന നേതാവ് ബൃന്ദ കാരാട്ട്. രാഷ്ട്രപതി ഒരു സംസ്ഥാനത്ത് എത്തുമ്പോൾ സംസ്ഥാന സർക്കാരിന്റെ പ്രതിനിധികൾ സ്വീകരിക്കാൻ ഉണ്ടാകണമെന്നത് പ്രാഥമികമായ മര്യാദയാണെന്ന് അവർ ഓർമ്മിപ്പിച്ചു. രാഷ്ട്രപതി എന്നത് രാജ്യത്തെ ഏറ്റവും ഉയർന്ന ഭരണഘടനാ പദവിയാണെന്നും ആ പദവിയെ ആദരിക്കാൻ സംസ്ഥാന സർക്കാരിന് ബാധ്യതയുണ്ടെന്നും ബൃന്ദ കാരാട്ട് പറഞ്ഞു. മുഖ്യമന്ത്രി മമത ബാനർജിക്ക് നേരിട്ട് എത്താൻ സാധിക്കാത്ത സാഹചര്യമായിരുന്നുവെങ്കിൽ, സർക്കാരിന് വേണ്ടി ഒരു മുതിർന്ന ഉദ്യോഗസ്ഥനെയോ പ്രതിനിധിയെയോ എങ്കിലും അവിടെ നിയോഗിക്കണമായിരുന്നു. ഇതിൽ യാതൊരു സംശയവുമില്ലെന്നും അവർ ദുംകയിൽ മാധ്യമങ്ങളോട് സംസാരിക്കവെ വ്യക്തമാക്കി.
വേദിയെ സംബന്ധിച്ച തർക്കങ്ങൾ ഒഴിവാക്കാമായിരുന്നുവെന്നും ബൃന്ദ കാരാട്ട് ചൂണ്ടിക്കാട്ടി. രാഷ്ട്രപതിയുടെ സന്ദർശനത്തിന് മുൻപ് തന്നെ വേദിയെക്കുറിച്ച് കൃത്യമായ ചർച്ചകൾ നടത്തി തീരുമാനമെടുത്തിരുന്നെങ്കിൽ ഇത്തരം അനാവശ്യ വിവാദങ്ങൾ ഒഴിവാക്കാമായിരുന്നു. രാഷ്ട്രപതി, ഗവർണർ എന്നീ പദവികൾ രാഷ്ട്രീയത്തിന് അതീതമാണെന്ന് ബൃന്ദ കാരാട്ട് ഓർമ്മിപ്പിച്ചു. “അവർ രാഷ്ട്രീയമായി തിരഞ്ഞെടുക്കപ്പെട്ടവരല്ല, ഏതെങ്കിലും രാഷ്ട്രീയ പാർട്ടിയിലെ അംഗങ്ങളുമല്ല. അതിനാൽ തന്നെ ഭരണഘടനാ പദവികൾ വഹിക്കുന്നവർ രാഷ്ട്രീയത്തിൽ നിന്ന് പൂർണ്ണമായും വിട്ടുനിൽക്കാൻ ബാധ്യസ്ഥരാണ്,” അവർ കൂട്ടിച്ചേർത്തു. ഭരണഘടനാ സ്ഥാപനങ്ങളുടെ അന്തസ്സ് കാത്തുസൂക്ഷിക്കേണ്ടത് ജനാധിപത്യ സംവിധാനത്തിൽ അത്യന്താപേക്ഷിതമാണെന്നും ബൃന്ദ കാരാട്ട് വ്യക്തമാക്കി.
