ആലപ്പുഴ : സനാതനപുരത്ത് വെട്ടേറ്റ സി.പി.എം ബ്രാഞ്ച് സെക്രട്ടറി അപകട നില തരണം ചെയ്തു. അടിയന്തര ശസ്ത്രക്രിയക്ക് ശേഷം തീവ്രപരിചരണ വിഭാഗത്തില് ചികിത്സയിലാണ് സി.പി.എം സനാതനപുരം എ ബ്രാഞ്ച് സെക്രട്ടറി കളര്കോട് സനാതനപുരം ഉമ്മാപറമ്പില് കെ.സുരേഷ്. അക്രമത്തില് നെഞ്ചിനും കൈക്കും വെട്ടേറ്റ നിലയിലായിരുന്നു സുരേഷിനെ മെഡിക്കല് കോളജ് ആശുപത്രിയില് പ്രവേശിപ്പിച്ചത്. വലിയചുടുകാടിനു കിഴക്ക് വീടിനോട് ചേര്ന്നു ഹോട്ടല് നടത്തുകയാണു സുരേഷ്. ഇന്നലെ രാവിലെ പത്തോടെ വീടിനു സമീപമാണ് ആക്രമണം. സുരേഷിന്റെ മകനെ അന്വേഷിച്ചാണു മനു എത്തിയതെന്നും സ്ഥലത്തില്ലെന്നു പറഞ്ഞപ്പോള് സുരേഷിനെ ആക്രമിക്കുകയായിരുന്നെന്നും ബന്ധുക്കള് പറയുന്നു.
സംഭവത്തില് സുരേഷിന്റെ സഹോദര പുത്രന് ഉമ്മാപറമ്പില് മനു സതീഷിനെ (34) സൗത്ത് പോലീസ് സംഭവ സ്ഥലത്തു നിന്ന് അറസ്റ്റ് ചെയ്യുകയായിരുന്നു. സൗത്ത് സിഐ എസ്.സനല്, എസ്ഐ റെജിരാജ് എന്നിവരുടെ നേതൃത്വത്തിലുള്ള സംഘമാണ് പ്രതിയെ പിടികൂടിയത്. സ്റ്റേഷനില് എത്തിച്ചപ്പോള് മനു പോലീസുകാര്ക്കെതിരെ ഭീഷണി മുഴക്കി ഭീകരാന്തരീക്ഷം സൃഷ്ടിച്ചു. ഇയാള് ലഹരി മരുന്ന് ഉപയോഗിക്കാറുണ്ടെന്നും 17 ആക്രമണ കേസുകളില് പ്രതിയാണെന്നും പോലീസ് പറഞ്ഞു. 2015 ലാണ് കാപ്പ കേസില് ജയില് ശിക്ഷ കഴിഞ്ഞത്.
