കോഴഞ്ചേരി : അനധികൃത മണല് വാരലിന് സിപിഎം കൂട്ട്. പാര്ട്ടി സെക്രട്ടറിയുടെ ജാഥയ്ക്ക് സിപിഎം ഭീഷണിപ്പെടുത്തി പണം പിരിക്കുന്ന ശബ്ദരേഖ പുറത്ത്. പാര്ട്ടി സെക്രട്ടറിയുടെ ജനകീയ പ്രതിരോധ ജാഥയ്ക്ക് 15,000 രൂപ സംഭാവന തന്നില്ലെങ്കില് കാണിച്ചു തരാമെന്ന് സിപിഎം ബ്രാഞ്ച് സെക്രട്ടറിയുടെ ഭീഷണി. പമ്പയില് നിന്ന് അനധികൃതമായി മണല് വാരുന്നവരോട് സിപിഎം തോട്ടപ്പുഴശേരി ബ്രാഞ്ച് സെക്രട്ടറി അരുണ് മാത്യു ഭീഷണി മുഴക്കുന്നുവെന്ന പേരിലാണ് ഓഡിയോ പ്രചരിക്കുന്നത്. 3000 രൂപ വേണേല് തരാമെന്ന് പറഞ്ഞ് പ്രതിരോധിക്കുന്ന മണല് വാരലുകാരനോട് നിന്നെയൊക്കെ കാണിച്ചു തരാമെന്ന് സെക്രട്ടറി പറയുന്നതാണ് ഓഡിയോ ക്ലിപ്പില് ഉള്ളത്.
കോഴഞ്ചേരിയോട് ചേര്ന്നു കിടക്കുന്ന പഞ്ചായത്താണ് തോട്ടപ്പുഴശേരി. പമ്പ ഒഴുകുന്നത് പഞ്ചായത്തിലൂടെയാണ്. മണല് വാരിയിരുന്ന കടവുകള് പഞ്ചായത്ത് പൂട്ടി സില് ചെയ്തിരിക്കുകയാണ്. ആ പൂട്ട് താക്കോല് ഉപയോഗിച്ച് തുറന്നാണ് വാരിയ മണല് കടത്തുന്നത്. ഇതിന് ഉദ്യോഗസ്ഥ വൃന്ദങ്ങളും കൂട്ട് നില്ക്കും
എന്ന് സംഭാഷണത്തില് നിന്ന് വ്യക്തമാണ്. ബ്രാഞ്ച് സെക്രട്ടറി ചോദിക്കുന്നത് ഒരു ലോഡ് മണല് സൈറ്റില് കുത്തുമ്പോള് ലഭിക്കുന്ന പണമാണ്.
എന്നാല് ഒരു ലോഡ് മണലിന് തങ്ങള്ക്ക് കിട്ടുന്നത് വെറും 4000 രൂപ മാത്രമാണെന്നാണ് വാരലുകാരന് പറയുന്നത്. തങ്ങള് കഷ്ടപ്പെട്ട് വാരി ചുമന്ന് കൊണ്ട് എത്തിക്കുന്നു. അതു കൊണ്ട് എല്ലാ വാരലുകാരും ചേര്ന്ന് മൂവായിരം രുപ തരാം. അതില് കൂടുതല് പറ്റില്ലെന്നും പറയുന്നു. ജാഥയില് പങ്കെടുക്കാന് ഒരു ബസ് പത്തനംതിട്ട പോകണമെങ്കില് 5000 രൂപ കൊടുക്കണമെന്ന് സെക്രട്ടറി പറയുന്നു. അതു കൊണ്ട് 15,000 രൂപയില് ഒരു പൈസ പോലും കുറയില്ലെന്നും പറയുന്നു.
3000 രൂപ എന്ന സംഭാവനയില് ഉറച്ചു നില്ക്കുകയാണ് മണല്വാരലുകാരന്. തങ്ങള് കെ.ജെ. രാജുവെന്ന സിപിഎം നേതാവിനോട് പറഞ്ഞിട്ടുണ്ടെന്നും പറയുന്നു. രാജുവല്ല ഇവിടെ കാര്യങ്ങള് തീരുമാനിക്കുന്നത്. അതൊക്കെ കഴിഞ്ഞ കാലമെന്ന് സഖാവിന്റെ മറുപടി. അരുണ് ആണ് ബ്രാഞ്ച് സെക്രട്ടറി. സിപിഎമ്മിനെ വെല്ലുവിളിച്ച് നിനക്കൊക്കെ മണല് വാരാന് കഴിയുമോ? നീയൊക്കെ എവിടുന്നൊക്കെ വാരുന്നുണ്ടെന്ന് എനിക്കറിയാം. ഒരു ലോഡ് മണലിന്റെ കാശ് വേണം. അല്ലെങ്കില് പോലീസിനെ കൊണ്ട് നിന്നെയൊക്കെ പിടിപ്പിക്കും എന്നും അരുണ് പറയുന്നുണ്ട്. ഇതിലൂടെ സിപിഎമ്മിന് ഒത്താശയോടെയാണ് മണല് മാഫിയ വളരുന്നതെന്നത് സ്പഷ്ടമാകുകയാണ്.
എന്നാല് മണല്വാരലുകാരന് യാതൊരു കൂസലുമില്ല. നീയെന്താന്ന് വെച്ചാല് അങ്ങ് കാണിക്ക്. 4000 രൂപ ഒരു ലോഡ് മണലില് കിട്ടും. പുലര്ച്ചെ ഒന്നിനും രണ്ടിനും ഇടയിലാണ് വാരുന്നത്. അതുകൊട്ടയിലാക്കി ചുമന്ന് വേണം ലോറിയില് കൊണ്ടിടാന്. ഒരു ലോഡ് മണല് ലോറിക്കാര് വില്ക്കുന്നത് 12,000 രൂപയ്ക്കാണ്. എന്നും അയാള് പറയുന്നു.
നിങ്ങള്ക്ക് എത്ര കിട്ടുമെന്നൊക്കെ വ്യക്തമായി എനിക്കറിയാം. ലോറിക്കാരുടെ കൈയില് നിന്ന് കൂടി വാങ്ങി 15,000 തരണം. അല്ലാത്ത പക്ഷം ഒരുത്തനെയും മണല് വാരാന് അനുവദിക്കില്ല. പോലീസില് അറിയിക്കും. സഖാവിന്റെ വെല്ലുവിളി മണല്വാരലുകാരന് തള്ളുന്നിടത്താണ് ഓഡിയോ അവസാനിക്കുന്നത്. മണല് വാരലിന് നിരോധനമുള്ള നദിയാണ് പമ്പ. പോലീസിനും സിപിഎം നേതാക്കള്ക്കും റവന്യൂ അധികൃതര്ക്കും കൈമടക്ക് കൊടുത്താണ് മണല് വാരല് നടക്കുന്നതെന്നാണ് ഓഡിയോ ക്ലിപ്പില് നിന്ന് പുറത്തു വരുന്നത്. എല്ലാവര്ക്കും പങ്കിട്ട് കഴിയുമ്പോള് മണല് വാരലുകാര്ക്ക് കിട്ടുന്നത് തുച്ഛമായ തുകയാണ്.
പത്തനംതിട്ട മീഡിയയില് ക്ലാസ്സിഫൈഡ് പരസ്യങ്ങള് കുറഞ്ഞ നിരക്കില്
മുന്നിര ചാനലായ പത്തനംതിട്ട മീഡിയയില് ക്ലാസ്സിഫൈഡ് പരസ്യങ്ങള് കുറഞ്ഞ നിരക്കില് നല്കാം. ഓണ് ലൈന് ന്യൂസ് പോര്ട്ടല് ആയതിനാല് നിങ്ങളുടെ പരസ്യം ക്ഷണനേരംകൊണ്ട് ലോകമെങ്ങും കാണും. വസ്തു, വീട്, വാഹനങ്ങള് എന്നിവ വാങ്ങാനും വില്ക്കാനും വീട് /ഓഫീസ് എന്നിവ വാടകയ്ക്ക് നല്കുവാനും, വാടകയ്ക്ക് എടുക്കുവാനും ഇടനിലക്കാരില്ലാതെ സാധിക്കും. കളര് ഫോട്ടോസ് ഉള്പ്പെടെയുള്ള പരസ്യത്തിന് 2000 രൂപ മാത്രം. ഒരുമാസം ഈ പരസ്യം പോര്ട്ടലില് ഉണ്ടാകും. ആവശ്യമെങ്കില് ഈ പരസ്യം വീണ്ടും പുതുക്കാം. ഇതിന് ഒരു മാസത്തേക്ക് 1000/ രൂപ മാത്രം. കൂടുതല് വിവരങ്ങള്ക്ക് 94473 66263, 85471 98263 വിളിക്കുക.
