ഏഴംകുളം : മന്നം സ്മൃതി മണ്ഡപം നിർമ്മാണം അടക്കമുള്ള എൻ.എസ്.എസിന്റെ പ്രവർത്തനങ്ങൾക്ക് തടസ്സം സൃഷ്ടിക്കുവാനുള്ള ശ്രമങ്ങൾ മന്നത്ത് പത്മനാഭനോടുള്ള അവഹേളനമായി കാണണമെന്ന് എൻഎസ്എസ് ഏഴംകുളം മേഖലാ നേതൃയോഗം അഭിപ്രായപ്പെട്ടു. സംഘടനാ വിരുദ്ധ ശക്തികളുടെ ഇത്തരം പ്രവർത്തനങ്ങൾ സമുദായ അംഗങ്ങൾ സംഘടിതമായി ചെറുക്കുമെന്ന് യോഗത്തിൽ പങ്കെടുത്ത ഏഴംകുളം മേഖലയിലെ കരയോഗ ഭാരവാഹികൾ പ്രമേയം പാസ്സാക്കി.
യാഥാർത്ഥ്യങ്ങൾ മറച്ചുവച്ചുകൊണ്ട് സംഘടനാ നേതൃത്വത്തിന് എതിരെ നടത്തുന്ന ദൂഷ് പ്രചാരണങ്ങൾ സമുദായ അംഗങ്ങൾ മനസ്സിലാക്കുമെന്നും സംഘടന നേതൃത്വത്തിന് പിന്നിൽ ശക്തമായി ഏഴംകുളം മേഖല അടിയുറച്ചു നിൽക്കുമെന്നും അംഗങ്ങൾ അഭിപ്രായപ്പെട്ടു.
അറുകാലികൾ പടിഞ്ഞാറ് എൻഎസ്എസ് കരയോഗ മന്ദിരത്തിൽ നടന്ന യോഗത്തിൽ എൻ എസ് എസ് സെക്രട്ടറി ഡോ കെ ബി ജഗദീഷ് അധ്യക്ഷത വഹിച്ചു. യൂണിയൻ സെക്രട്ടറി ജി അജിത് കുമാർ സംഘടനാ പ്രവർത്തന വിശദീകരണം നടത്തി. യൂണിയൻ ഭരണസമിതി അംഗങ്ങളായ സി ആർ ദേവലാൽ, അഡ്വ പി ഹരി, എൻ എസ് എസ് ഇൻസ്പെക്ടർ വി പ്രശാന്ത് കുമാർ എന്നിവർ പ്രസംഗിച്ചു.
