കൊച്ചി : നടിയെ ആക്രമിച്ച കേസില് ദിലീപിന്റെ ഭാര്യയും നടിയുമായ കാവ്യാമാധവനെ ചോദ്യം ചെയ്യാന് ക്രൈംബ്രാഞ്ച് ആലുവയിലെ വീട്ടിലെത്തി.
പോലീസ് പറയുന്നിടത്തല്ല തന്റെ വീട്ടിലെത്തി ചോദ്യം ചെയ്യണം എന്ന നിലപാടില് ഉറച്ചുനില്ക്കുകയായിരുന്നു കാവ്യ. നടിയെ തട്ടിക്കൊണ്ടുപോയി പീഡിപ്പിച്ചെന്ന കേസിന്റെ തുടരന്വേഷണത്തിന്റെ കാവ്യയെ ചോദ്യം ചെയ്യുന്നത്. നടിയെ പീഡിപ്പിച്ച കേസിലെ അന്വേഷണ ഉദ്യോഗസ്ഥരെ അപായപ്പെടുത്താന് ഗൂഢാലോചന നടത്തിയെന്ന കേസ് അന്വേഷിക്കുന്ന സംഘവും കാവ്യയുടെ വീട്ടിലെത്തി. ഈ കേസില് ദിലീപ് ഒന്നാം പ്രതിയാണ്.
ചോദ്യം ചെയ്യലിനു ഹാജരാകാന് ആവശ്യപ്പെട്ട് ക്രൈംബ്രാഞ്ച് വീണ്ടും കാവ്യയ്ക്ക് നോട്ടീസ് നല്കിയിരുന്നു. ചോദ്യം ചെയ്യലിനായി തിങ്കളാഴ്ച 11 മണിക്ക് ഹാജരാകാനായിരുന്നു നിര്ദേശം. എന്നാല് ആലുവ പത്മസരോവരം വീട്ടില് വെച്ച് ചോദ്യം ചെയ്യാമെന്ന് കാവ്യ ക്രൈംബ്രാഞ്ചിനെ അറിയിച്ചു. ഇതേത്തുടര്ന്നാണ് ക്രൈംബ്രാഞ്ച് സംഘം പത്മസരോവരത്തിലെത്തി ചോദ്യം ചെയ്തത്. നേരത്തെയും ചോദ്യം ചെയ്യലിനു ഹാജരാകാന് ആവശ്യപ്പെട്ട് ക്രൈംബ്രാഞ്ച് കാവ്യയ്ക്ക് നോട്ടീസ് നല്കിയിരുന്നു. എന്നാല് അസൗകര്യം അറിയിച്ച് കാവ്യ ക്രൈംബ്രാഞ്ചിന് കത്തുനല്കുകയായിരുന്നു.
അതിജീവിതയായ നടിയും കാവ്യയും തമ്മിലുള്ള വിരോധമാണ് കേസിനു വഴിയൊരുക്കിയ പീഡനത്തിനു കാരണമായതെന്ന് ദിലീപിന്റെ സഹോദരീ ഭര്ത്താവിന്റെ ശബ്ദ സന്ദേശം പുറത്തുവന്നിരുന്നു. തുടര്ന്നാണ് കാവ്യയുടെ മൊഴിയെടുക്കാന് ക്രൈംബ്രാഞ്ച് തീരുമാനിച്ചത്. നടിയെ പീഡിപ്പിച്ച കേസിനു മുന്പ് അതിജീവിത, നടന് ദിലീപ്, നടി മഞ്ജു വാരിയര് എന്നിവര്ക്കിടയില് ഏതെങ്കിലും സാമ്പത്തിക, റിയല് എസ്റ്റേറ്റ് ബിസിനസുകള് നടത്തിയിട്ടുണ്ടോയെന്ന് അന്വേഷണ സംഘം പരിശോധിച്ചിരുന്നു. തുടരന്വേഷണത്തില് ഇത്തരത്തിലുള്ള ചില സൂചനകള് അന്വേഷണ സംഘത്തിനു ലഭിച്ചിരുന്നു. ഇത്തരം വിവരങ്ങളുടെ അടിസ്ഥാനത്തിലാണ് കാവ്യയെ ചോദ്യം ചെയ്യുന്നത്.
