കൊച്ചി : നടിയെ ആക്രമിച്ച കേസില് ദിലീപിന്റെ ജാമ്യം റദ്ദാക്കാന് വിചാരണക്കോടതിയെ സമീപിക്കാനൊരുങ്ങി ക്രൈം ബ്രാഞ്ച്. ദിലീപ് ജാമ്യവ്യവസ്ഥകള് ലംഘിച്ചെന്ന് കാണിച്ച് ഹര്ജി നല്കും. ദിലീപ് സാക്ഷികളെ സ്വാധീനിക്കാനും തെളിവുകള് നശിപ്പിക്കാനും ശ്രമിച്ചെന്നും അന്വേഷണസംഘം പറയുന്നു. നടിയെ ആക്രമിച്ച കേസില് തുടരന്വേഷണം നടക്കുന്നതിനിടെയാണ് ക്രൈംബ്രാഞ്ച് ഈ നിര്ണായക നീക്കം നടത്തുന്നത്. പുതിയ തെളിവുകള് നല്കിയാവും ക്രൈംബ്രാഞ്ച് ഹര്ജി നല്കുക. നടിയെ ആക്രമിച്ച കേസില് നേരത്തേ ദിലീപിന് ജാമ്യം നല്കുമ്പോള് ജാമ്യവ്യവസ്ഥകള് ലംഘിച്ചാല് അന്വേഷണോദ്യോഗസ്ഥന് വിചാരണക്കോടതിയെ സമീപിക്കാമെന്ന് ഹൈക്കോടതി അറിയിച്ചിരുന്നു.
ഇതിന്റെയടിസ്ഥാനത്തിലാണ് വിചാരണക്കോടതിയെ സമീപിക്കാന് അന്വേഷണസംഘം ഒരുങ്ങുന്നത്. ചൊവ്വാഴ്ച ഈ കേസുമായി ബന്ധപ്പെട്ട് അന്വേഷണോദ്യോഗസ്ഥനായ ഡി,വൈ.എസ്.പി ബൈജു പൗലോസിനോട് വിചാരണക്കോടതിയില് ഹാജരാകാന് ആവശ്യപ്പെട്ടിട്ടുണ്ട്. ഈ കേസുമായി ബന്ധപ്പെട്ട് ദിലീപിന്റെ ഫോണില് നിന്ന് കോടതിയുമായി ബന്ധപ്പെട്ടതടക്കമുള്ള ചില രേഖകള് പുറത്തുവന്നിരുന്നു. ഇക്കാര്യം മാധ്യമങ്ങളിലൂടെ വന്നതിന്റെ അടിസ്ഥാനത്തിലാണ് വിശദീകരണം നല്കാന് അന്വേഷണോദ്യോഗസ്ഥനോട് ഹാജരാകാന് കോടതി ആവശ്യപ്പെട്ടത്.
