പത്തനംതിട്ട: നിരവധി ക്രിമിനല് കേസുകളില് പ്രതിയായ യുവാവിനെ കാപ്പ നിയമപ്രകാരം ജയിലിലടച്ചു. തിരുവല്ല കാവുംഭാഗം ആലുംതുരുത്തി വാമനപുരം കന്യാകോണില് തുണ്ടിയില് വീട്ടില് അലക്സ് എം.ജോര്ജിനെയാണ് (21) തിരുവല്ല പോലീസ് അറസ്റ്റ് ചെയ്ത് പൂജപ്പുര സെന്ട്രല് ജയിലില് പാര്പ്പിച്ചത്. തിരുവല്ല, കോട്ടയം ജില്ലയിലെ വൈക്കം, ഗാന്ധിനഗര് തുടങ്ങിയ പോലീസ് സ്റ്റേഷനുകളിലായി 10 ക്രിമിനല് കേസുകളില് പ്രതിയാണ് അലക്സ്.
അടിപിടി, വീടുകയറി ആക്രമണം, വാഹനങ്ങള് നശിപ്പിക്കല്, കൊലപാതകശ്രമം, മുളക് സ്പ്രേ ഉപയോഗിച്ചുള്ള ആക്രമണം, സ്ത്രീകള്ക്കെതിരായ അതിക്രമം തുടങ്ങിയ കുറ്റകൃത്യങ്ങളില് ഇയാള്ക്കെതിരെ എട്ടെണ്ണത്തിലും അന്വേഷണം പൂര്ത്തിയാക്കി കുറ്റപത്രം സമര്പ്പിച്ചിട്ടുണ്ട്. ഇയാളെ പത്തനംതിട്ടയില് നിന്ന് പുറത്താക്കാന് ജില്ല പോലീസ് മേധാവി റിപ്പോര്ട്ട് സമര്പ്പിച്ചതിന്റെ അടിസ്ഥാനത്തില്, തിരുവനന്തപുരം റേഞ്ച് ഡി.ഐ.ജി ഇയാളെ വിളിപ്പിച്ച് ശക്തമായ താക്കീത് നല്കിയിരുന്നു.എന്നാല് തുടര്ന്നും ഇയാള് കുറ്റകൃത്യങ്ങളില് ഏര്പ്പെട്ടതിനെത്തുടര്ന്നാണ് കാപ്പ വകുപ്പ് പ്രകാരം നടപടിയെടുത്തത്.
