ചെന്നൈ : എം.എസ് ധോണിയെ അമിതമായി ആരാധിക്കുന്നത് ചെന്നൈ സൂപ്പർ കിംഗ്സിന് തിരിച്ചടിയാകുന്നുവെന്ന വിമർശനവുമായി മുൻ ഇന്ത്യൻ താരം സഞ്ജയ് മഞ്ജരേക്കർ രംഗത്തെത്തി. ആറ് മത്സരങ്ങളിൽ നാലിലും തോറ്റ് പോയിന്റ് പട്ടികയിൽ പിന്നിലായ സിഎസ്കെയുടെ അവസ്ഥയെ രൂക്ഷമായ ഭാഷയിലാണ് അദ്ദേഹം വിമർശിച്ചത്. ധോണിയോടുള്ള അമിത ആരാധന കാരണം ടീം മാനേജ്മെന്റിന് കൃത്യമായ തീരുമാനങ്ങൾ എടുക്കാൻ കഴിയുന്നില്ലെന്ന് മഞ്ജരേക്കർ ചൂണ്ടിക്കാട്ടി. പരിക്കേറ്റ ധോണി എപ്പോൾ മടങ്ങിവരും ഏത് പൊസിഷനിൽ കളിക്കും ധോണി വരുമ്പോൾ ആരെ പുറത്തിരുത്തും എന്നീ കാര്യങ്ങളിൽ ഇപ്പോഴും അവ്യക്തത തുടരുകയാണ്. വെറും മൂന്നോ നാലോ പന്തുകൾ മാത്രം നേരിടാനാണ് ധോണി എത്തുന്നതെങ്കിൽ അത് ടീമിന് ഗുണത്തേക്കാളേറെ ബാധ്യതയാകുമെന്നും അദ്ദേഹം പറഞ്ഞു.
ധോണിയുടെ നിഴലിൽ നിൽക്കേണ്ടി വരുന്നത് പുതിയ ക്യാപ്റ്റൻ റുതുരാജ് ഗെയിക്വാഡിന് വലിയ തിരിച്ചടിയാണെന്നും മഞ്ജരേക്കർ നിരീക്ഷിച്ചു. ആരാധകരുടെ പൂർണ്ണ പിന്തുണ ലഭിക്കാത്തതും ധോണിയുടെ പാരമ്പര്യം ഉയർത്തിപ്പിടിക്കാനുള്ള സമ്മർദ്ദവും റുതുരാജിന്റെ ബാറ്റിംഗിനെ ബാധിച്ചിട്ടുണ്ട്. നായകനാകുന്നതിന് മുൻപ് പുറത്തെടുത്തിരുന്ന മികവ് തുടരാൻ റുതുരാജിന് കഴിയുന്നില്ല. ഈ സീസണിൽ ആറ് മത്സരങ്ങളിൽ നിന്ന് വെറും 82 റൺസ് മാത്രമാണ് റുതുരാജിന്റെ സമ്പാദ്യം. ചെന്നൈ ടീമിനുള്ളിലെ ഈ അനിശ്ചിതത്വം ഉടൻ പരിഹരിച്ചില്ലെങ്കിൽ ഇത്തവണ പ്ലേ ഓഫ് കാണാതെ ടീം പുറത്താകുമെന്നും മഞ്ജരേക്കർ മുന്നറിയിപ്പ് നൽകി.
