കോഴിക്കോട്: തൊപ്പി എന്നറിയപ്പെടുന്ന യൂട്യൂബറും ഓണ്ലൈന് ഗെയ്മറുമായ മുഹമ്മദ് നിഹാദിനെതിരായ പരാതിയില് അന്വേഷണം ആരംഭിച്ച് സൈബര് പോലീസ്. കൊച്ചി സിറ്റി സൈബര് പോലീസാണ് അന്വേഷണം ആരംഭിച്ചത്. റിപ്പോര്ട്ട് സംസ്ഥാന സൈബര് ഓപ്പറേഷന് വിഭാഗത്തിന് നല്കും. റിപ്പോര്ട്ട് പരിശോധിച്ച ശേഷം കേസെടുക്കുന്നതില് തീരുമാനമെടുക്കും. ലഹരിമരുന്ന് ഉപയോഗം, അശ്ലീല പ്രചരണം, പോക്സോ, ലൈംഗീക ചൂഷണം തുടങ്ങിയ പരാതികളിലാണ് അന്വേഷണം. പരാതിയില് അന്വേഷണം നടത്താന് ഡിജിപി നിര്ദേശം നല്കിയിരുന്നു. ഒരു അഭിഭാഷകന്റെ പരാതിയിലായിരുന്നു കേസെടുക്കാന് നിര്ദ്ദേശം. നിഹാദിനെതിരായ പരാതിയില് അന്വേഷണം നടത്തുമെന്ന് ആഭ്യന്തര മന്ത്രി രമേശ് ചെന്നിത്തലയും കഴിഞ്ഞ ദിവസം വ്യക്തമാക്കിയിരുന്നു. അന്വേഷിച്ച് നടപടിയെടുക്കും എന്ന് ചെന്നിത്തല പറഞ്ഞിരുന്നു.
പോക്സോ കേസുകള്, നര്ക്കോട്ടിക്, എംഡിഎംഎ ഉപയോഗം, മാനസിക-ശാരീരിക പീഡനങ്ങള്, അശ്ലീല പ്രചരണം, സൈബര് കുറ്റകൃത്യങ്ങള് തുടങ്ങിയ ആരോപണങ്ങളിലാണ് നിഹാദിനും സുഹൃത്തുക്കള്ക്കുമെതിരെ ഡിജിപി അന്വേഷണത്തിന് ഉത്തരവിട്ടത്. അഡ്വ. ശ്രീജിത്ത് പെരുമനയുടെ പരാതിയിലാണ് ഡിജിപി റവാഡ ചന്ദ്രശേഖറിന്റെ ഉത്തരവ്. സംസ്ഥാന സൈബര് ഓപ്പറേഷന്സ് സൂപ്രണ്ട് അങ്കിത് അശോകനാണ് അന്വേഷണ ചുമതല.
