തൃശൂര്: തൃശൂരില് ഇന്നലെയുണ്ടായ ചുഴലിക്കാറ്റില് വ്യാപക കൃഷി നാശം. മറ്റത്തൂരില് അയ്യായിരത്തിലേറെ കുലച്ച ഏത്തവാഴകകളും ഏക്കറ് കണക്കിന് ജാതികൃഷിയും നശിച്ചു. അരമണിക്കൂര് നീണ്ടു നിന്ന ചുഴലിക്കാറ്റും പേമാരിയും കൃഷി മുഴുവന് തകര്ത്തെറിഞ്ഞു. ആയിരക്കണക്കിന് വാഴകളും ജാതിയും ഒടിഞ്ഞതോടെ കനത്ത ദുരിതത്തിലായിരിക്കുകയാണ് കര്ഷകര്.
ഇന്നലെ വൈകീട്ട് 4.30 ഓടെയായിരുന്നു തൃശൂര് മറ്റത്തൂര് ഭാഗങ്ങളില് മിന്നല് ചുഴലിയും മഴയും നാശം വിതച്ചത്. അരമണിക്കൂറോളം നീണ്ട കാറ്റില് ആയിരക്കണക്കിന് വാഴകള് ഒടിഞ്ഞു വീണു. നൂറു കണക്കിന് ജാതി മരങ്ങള് കടപുഴകി. അപ്രതീക്ഷിതമായെത്തിയ ദുരിതത്തില് പ്രദേശത്താകെ കനത്ത കൃഷി നാശമാണുണ്ടായത്. 400 മുതല് 600 വരെ വാഴകള് നശിച്ച കര്ഷകരുമുണ്ട്. കടുത്ത പ്രതിസന്ധിയിലാണ് കര്ഷകര് ഓരോര്ത്തരും. അതേസമയം വിള ഇന്ഷുറന്സും കൃഷിവകുപ്പിന്റെ ധന സഹായവും വേഗത്തിലാക്കുമെന്ന് സ്ഥലത്തെത്തിയ കൃഷി ഓഫീസര് പറഞ്ഞു.
